کوئٹہ۔ 03 فروری (اے پی پی) گورنر بلوچستان امان اللہ خان یاسین زئی یوم کشمیر نا بابت تینا اسہ کلہو اسے ٹی پارینے کہ ننا کشمیری ایلمک اسہ بھلو وخت اسے آن تینا حق خودارادیت نا دوئی کننگ کن جہد کننگ ءُ۔ اوفتا جہد آجوئی ءِ توننگ کن اوفتیا ہروڑنا ظلم کننگ انگ ءِ ولے اوکان پد ہم اوفک صبر و سگ اٹ ہمو مصیبت آتا مقابلہ ءِ کرسا تینا حق و آجوئی نا دوئی کننگ کن جہد کننگ ءُ۔ اوپارے کہ پاکستان مدام ہرفورم آ تینا کشمیری ایلم تا روا موقف نا نئے بیرہ مخ تفی ءِ کرینے بلکن اوفتیا مروک آ ظلم و بیدادی ءِ جہانی کہول آ تالان ہم کننگ ءِ۔ گورنر بلوچستان پارے کہ بھارت نا کنڈآن مقبوضہ کشمیر آ اونا پورو کوزہ و بھارتی آئین نا آرٹیکل 370 و اے 35 نا منسوخی نئے بیرہ غٹ کانود و قدر آتا خلاف ورزی ءِ بلکن داڑآن بھارت نا تینا وحشی و غیر جمہوری دروشم ہم دنیا نا مون آ پاش مس۔ گورنر بلوچستان امان اللہ خان یاسین زئی پارے کہ پنچ فروری آ یوم کشمیر اڈتننگ نا مسخت تینا کشمیری ایلم تا جہد آجوئی نا پورو مخ تفی ءِ کننگ نا ءِ، دارداٹ پاکستان نا اولیکو دے آن پرزور خواست مسنے کہ اقوام متحدہ نا قرارداد آتے مون آتخسا مقبوضہ کشمیر نا الس ءِ حق خودارادیت تننگے تانکہ او تینا قسمت نا فیصلہ ءِ تینٹ کننگ کیر۔ ہنداخاطرآن المی ءِ کہ جہانی برادری نا چکار ءِ کشمیر نا کنڈآ کرفنگے و جہانی رائے ءِ اوفتا حق اٹ استوار کننگے۔ گورنر یاسین زئی دعا کرے کہ اللہ تعالیٰ غٹ کشمیری ایلم تے اوفتا جہد آجوئی ٹی سرسہبی عطاکے۔
