اسلام آباد۔2فروری (اے پی پی):صدر مملکت ڈاکٹر عارف علوی ءَ ھاسیں مردم آناں شرپ مندیں روزگار در جنگ ءِ گوما ملک ءِ گہبودی ءُ اقتصادی دیمروئی ءَ وتی کرد پیلو کنگ ءِ لائک جوڑ کنگ ءِ واستہ ہنر مند ءُ ازمکاری ءَ را سہرا کنان ءَ نیشنل ووکیشنل اینڈ ٹیکنیکل ٹریننگ کمیشن نیوٹیک ءُ ایندگر سیادی داروکیں ادارگ آنی سر ءَ زور پر دات کہ اے ھولگ ءَ جوانیں گامگیج کنگ بہ بیت۔ آ سئے شمبے ءَ ادا ھاسیں مردم آنی گہبود ءِ واستہ کار کنوکیں ادارگ آنی نماھند آنی گوما دیوان ءِ سروکی ءَ کنگ ءَ ات۔ دیون ءَ راجی اسمبلی ءِ باسک منزہ حسن، سیکرٹری وزارت بنی آدمی ھک انعام اللہ خان، چیئرمین نیوٹیک سید جاوید حسن، ڈائریکٹر جنرل سپیشل ایجوکیشن شیخ اظہر سجاد ءُ این جی اوز آنی نماھندگ آں بھر زوری کت۔ صدر ءِ مملکت ءَ گوشت کہ ھاسیں مردم آناں شرپ مندیں روزگار ءِ پجاری ءِ واستہ سیادی داروکیں ادارگ ایشاناں بلدکار جوڑ کنگ ءِ واستہ گامگیج بکن انت، ھاسیں مردم آنی ھیل کواری ءِ واستہ میاں اوستمانی کد ءُ بالاد ءِ رد ءَ استیں ھیل کاری سلیبس ءِ سر ءَ چار ءُ بچار کنگ ءِ ضلورت انت۔ صدر عارف علوی ءَ گوشت کہ ھاسیں مردم ملکی آباتی ءِ کساس 12 ءَ چہ 14 درسد انت، ایشاناں جتا جتائیں شوبگ آنی تہ ءَ ھیل کاری دیان ءَ بنجاھی وانگ ءُ زانگ ءُ معاشی نظام ءَ ھوار کنگ لوٹ ایت۔ حکومت ءَ ھاسیں مردم آنی گہبود ءِ واستہ احساس کفالت پروگرام ءِ چیر دستی ءَ گامگیج کتگ۔ آئی ءَ گوشت کہ اسٹیٹ بینک آف پاکستان ءِ نیمگ ءَ ھاسیں مردم آنی واستہ وام ءِ واستہ زر گیشینگ بوتگ، ھاسیں مردم آنی واستہ جتائیں فنڈز سرپدی نہ بوھگ ءِ سبب ءَ کمو کارمرد بوتگ انت، اے رنگیں اسکیم آں چہ سیت چست کنگ ءِ واستہ ھاسیں مردم آنی زانت ءُ سرپدی پجارینگ ءِ ضلورت انت۔ آئی ءَ گوشت کہ سیادی داروکیں گل ءُ این جی اوز آنی نیام ءَ جوانیں رابطہ برجا کنگ ءِ ضلورت انت، ھاسیں مردم آنی گہبود ءِ واستہ گامگیج چاگرد ءِ توامیں تبک ءِ یکجائیں زمہ واری انت۔ آئی ءَ ھاسیں مردم آنی گہبود ءِ واستہ این جی اوزآنی گامگیج آناں ساڑات۔
