اسلام آباد۔ 02 فروری (اے پی پی) وزیر خارجہ مخدوم شاہ محمود قریشی پارینے کہ پاکستان نا سفارتی وڑاٹ تنیا مننگ نا تاثر درست اف، ننے حکومت ملا تو پاکستان خواتہ مننگ نا خڑک ئس۔ ہمووخت آ سنگت ملک آک اگہ ننا کمک ءِ کتورہ تو حالیت آک جتا مسرہ، خارجہ پالیسی ءِ سیاسی و زرگزرانی حالیت آتیان جتا کرسا ہُننگ مفک، ملک اٹی سیاسی نزوری نا فضاودی کروک آ واکدارک سفارتی پڑآ پاکستان ءِ مشکل آتیان دوچار کننگ ءُ، زرگزرانی سفارتکاری آن براعظم افریقہ کن برآمد آتیٹی ہفت درسد نا ودکی مسنے، اوغانستان نا حکومت تینٹ اعتراف کننگ ءِ کہ پاکستان امن کوشست آتیٹی اوفتا کمک ءِ کننگ ءِ، بائیڈن انتظامیہ و پاکستان نا نقطہ نظر اٹ اوغانستان نا بابت یکسانیت ءِ، ایران تون ہڑتوم آ کنڈآتا تعلقداری تیٹی گچینی بسنے، چین اتون ننا تعلقداری تے پین وسعت دوئی مننگ ءِ، سعودی عرب تون ننا برادرانہ تعلقداری ءِ و مریک، ننا معاہدہ خاص مدت کن ئس، زرمبادلہ نا کوڑیک گچین مسر تو اودے زرپدی تسن ، متحدہ عرب امارات پیدوار کرینے کہ بھارت تون اونا تعلقداری پاکستان نا قیمت آ مفک، بھارتی حکومت نا ہندوتواسوچ ڈیہہءِ گڑتی تیان دوچار کرینے، ہندوستان بلوچستان اٹی دہشت گردی نا پشت پناہی ءِ کننگ ءِ، ہندوستان نا کنڈآن پاکستان نا سیمی دنگ انا پدریسہ خلاف ورزی تا معاملہ ءِ جہانی کہول آ ہرفینن، سیمی علاقہ ٹی رہینگوک شاری تیکن بنکرز جوڑ کننگک، پدریسہ دُوانزہ دُوانزدہ سال کشمیر کمیٹی نا کماشی ءِ کروک آک کشمیر نا ویل انا بابت چپ مسر۔ تدوک آ حکومت نا گٹ اٹ کشمیر نا لوز اڑینگاکہ، نن کشمیر نا ویل ءِ مچ آ دنیا پبی وڑاٹ تالان کرین، اسہ لمہ نا ماراس ہم کشمیر نا سودا ءِ کننگ کپک۔ تینا اسہ بیان اسے ٹی وزیر خارجہ پارے کہ خارجہ پالیسی نا اثرآک دوررس مریرہ، داہُننگ نا گرج ءِ کہ سفارتی پڑ آ مون تروک چیلنج انت تدوک آ دونیم سال انا ءُ یا اوکان مست انا ءُ، دا چیلنج آتا زموار ننے آن زیات ہموفک ءُ ہرافک چار چار وار حکومت اٹ رہینگار۔ اوپارے کہ ہرا پدریسہ دُوانزدہ دُوانزدہ سال اسکان کشمیر کمیٹی نا کماشی ءِ کرسا کریر ولے بھرمک غٹ انا مون آٹی ءُ۔ دامعاملہ غا سیاست کپرہ۔ خارجہ پالیسی نا انحصار بیرہ نما تینا پالیسی تیا مفک بلکن پیشن نا زہم آک ہم داڑآ اثرانداز مریرہ، پیشن نا ملک سفیر تعینات مروک دانزاکت آتے زیات جوان وڑاٹ پہہ مننگ کیرہ۔ اوپارے کہ داتاثر تننگ نا کوشست کننگاکہ پاکستان خوانخواستہ تنیا مسنے داوڑ اسُل اف، ہاں، ہندوستان نا کوشست مسنے کہ ننے تنیا کننگے اگہ داوڑ مسکہ تو ننے ہیومن رائٹس کونسل نا سرسہبی رسینگتوکہ، اینو ہندوستان نا ہندوتوا پالیسی تا سوب مچ آ دنیا ٹی ہور ہرفنگ انگ ءِ۔ اوپارے کہ نما سفارتکاری نا گہرا تعلق زرگزرانی حالیت آتون مریک، ہراتم ننے حکومت رسینگا تو پاکستان خواتہ مننگ نا خڑک ئس، ہمووخت سنگت ملک آک اگہ ننا کمک ءِ کتورہ تو حالیت آک جتا مسرہ۔ وزیر خارجہ پارے کہ است ہسونی اٹ پاروئی تمک کہ بھاز انگا ننا سیاست دان تینا سیاسی دوکان ءِ چمکائفنگ کن کشمیر نا معاملہ ءِ پدی دِکہ تسر، نن خارجہ پالیسی ءِ سیاسی و زرگزرانی حالیت آتیان جتا کرسا ہُننگ کپنہ۔ ہراواکدارک پاکستان اٹ سیاسی نزوری نا فضاء اس ودی کننگ ءُ او سفارتی پڑ آ پاکستان ءِ مشکل آتیان دوچار کننگ ءُ، ہنداخاطرآن نن زرگزرانی سفارت کاری آ زور شاغان، زرگزرانی سفارتکاری بیرہ درآمدات و برآمدات اسکان محدود اف دا اسہ جامع عمل اسے۔
