پاکستان و برطانیہ نا ڈوہدار تا حوالگی نا بابت معاہدہ ءِ زوت حتمی دروشم اس تننگ آ امنا، وزیر داخلہ شیخ رشید احمد تون برطانوی ہائی کمشنر کرسٹیئن ٹرنر نا اوڑدہی

اسلام آباد۔ 02 فروری (اے پی پی) وزیر داخلہ شیخ رشید احمد پارینے کہ پاکستان و برطانیہ ڈوہدار تا حوالگی نا بابت معاہدہ غا پیش رفت نا جاچ ءِ ہلسا معاہدہ ءِ زوت حتمی دروشم اس تننگ آ امنا کرینو۔ سے شنبے نادے آ وزیر داخلہ شیخ رشید احمد تون پاکستان اٹی برطانیہ نا ہائی کمشنر کرسٹیئن ٹرنر اوڑدہی کرے ہراٹی پاکستان و برطانیہ نا نیام اٹ ہڑتوم آ کنڈآتا تعلقداری و تین پہ تینی است خواہی نا باندات آگپ وتران کننگا۔ اوڑدہی ٹی پاکستان و برطانیہ نا نیام اٹ ڈوہدار تا حوالگی نا بابت معاہدہ نا بابت پیش رفت نا جاچ ءِ ہم ہلنگا و وزیر داخلہ و برطانوی ہائی کمشنر معاہدہ ءِ زوت حتمی دروشم اس تننگ آ امنا کریر۔ وزیر داخلہ شیخ رشید احمد داوخت آ گپ وتران کرسا پارے کہ پاکستان و برطانیہ نا نیام اٹ دیرینہ تعلقداری ءِ ، ہڑتوم آ ملک آتا الس نا نیام اٹ ہم گچین تعلقداری ءِ۔ اوپارے کہ برطانیہ نا پاکستان نا بابت مثبت سیکورٹی ایڈوائس نا سوب آن ملک ءِ بھاز فائدہ مس و پاکستان نا پیشن نا دنیا ٹی تاثر گچین مس۔ اوپارے کہ بھلو بدبختی اسے کہ نیزگار ملک آتیان پیسہ پلوک آ بھلا ملک آتیٹی پناہ ہلیرہ، ہندن ءُ گام گیج بایدے کننگے کہ جرم کروک آ بندغ ءِ ہچ ءُ جاگہ اس پناہ ملپ۔ اوپارے کہ پاکستان و برطانیہ نا نیام اٹ رابطہ غاتے پین ترند کننگ نا گرج ءِ۔ داوخت آ برطانوی ہائی کمشنر پاکستان اٹی کورونا دین ءِ کنٹرول کننگ نا بابت حکومتی گام گیج و بست وبند آتے است جم گوندا۔ اوپارے کہ پاکستان نا داخلی سیکورٹی نا حالیت آک بھاز است جم ءُ، پاکستان و برطانیہ نا نیام اٹ واپار ءِ ودفنگ کن گام گیج آتے ترند کننگ نا گرج ءِ۔ اوپارے کہ برٹش ایئرویز و ورجن ایئرلائنز چلینگ آن ہڑتوم آ ملک آتا نیام اٹ واپار و سیل و سوات ءِ مون آ دننگ رسینگک۔