کوئٹہ۔ 02 فروری (اے پی پی) بنجائی وزیر دفاعی پیداوار زبیدہ جلال پارینے کہ گوادر شپ یارڈ حکومت بلوچستان نا ملکیت مریک ہرادے بنجائی حکومت ایکویٹی نا رداٹ دوئی کننگ ءِ گوادر شپ یارڈ انا کاریم نا کچ کراچی شپ یارڈ آن بھاز زیات مریک ہرا بلوچستان و ملک انا زرگزرانی و اقتصادی شونداری ٹی بھلواہمیت اس تخوک پک مریک۔ داخیال آتا درشانی ءِ اوسے شنبے نادے آ وزیراعلیٰ سیکرٹریٹ اٹی گوادر شپ یارڈ انا بابت حکومت بلوچستان و بنجائی حکومت نا نیام اٹ ایم او یو آ دستخط نا دود انا وخت آ تران کرسا کرے۔ داوخت آ وزیراعلیٰ بلوچستان جام کمال خان صوبائی وزیر میر محمد سلیم کھوسو، میر عارف جان محمد حسنی، پارلیمانی سیکرٹری حوالکاری بشریٰ رند و تعلقدار صوبائی و بنجائی آفیسر آک ساڑی ئسر۔ بنجائی وزیر دفاعی پیداوار زبیدہ جلال پارے کہ بلوچستان نا ورناتے ایچ آئی ٹی، گوادر انسٹی ٹیوٹ و کراچی شپ یارڈ اٹ کسبی تربیت تننگک تانکہ او کسبکار مرسا روزگار نا قابل مننگ کیر، اوپارے کہ کراچی شپ یارڈ انا مقابلہ ٹی گوادر شپ یارڈ اٹی بحری جہاز آتا جوڑ جاڑ کن ہم ورکشاپ مریک وخت اس کہ نسبتا گوادر شپ یارڈ اٹ پوسکن آ آسراتی ہم زیات مریک اوپارے کہ گوادر اٹی ہندی آبادی ءِ بنداوی آسراتی تا فراوانی نا زمہ بنجائی حکومت ہرفینے گوادر آن اسٹ ءِ ہم بیدخل کننگپک بلکن ہندی آبادی ءِ تعلیم جان جوڑی تون اوار بنداوی زند انا گرج آتا فراوانی کن جامع ڈٹ بندی کننگ انگ ءِ اوپارے کہ بنجائی حکموت گوادر و ایب و کیب انا شونداری کن پبی کمکاری نا پکا باوری کرفینے و دارداٹ بلوچستان نا کنڈآن ہراکہ خواست آتے کننگانے اوفتیا سنجیدہ عملدرآمد کننگ انگ ءِ۔ اوپارے کہ بلوچستان اٹی داوخت آ اسہ ہندن ءُ جماعت اسے نا حکومت ءِ ہرا الس نا ویل آتیان جوانی اٹ معلومدار ءِ و بلوچستان نا حق انا جوان دفاع ءِ کننگ ءِ۔ داوخت آ وزیراعلیٰ بلوچستان جام کمال خان تران کرسا پارے کہ گوادر شپ یارڈ انا جوائنٹ وینچر اسہ تاریخی ءُ ڈٹ اسے ہرا آخبت اٹ بلوچستان نا زرگزرانی و اقتصادی شونداری ٹی اہم کڑد ادا کیک نن فیصلہ کرینن کہ بنجائی ڈٹ آتیٹی بلوچستان نا وسیلہ غاتا سہی کاریم اٹ اتنگ ءِ پک کرسا ایکویٹی بنداو تیا گچین وڑاٹ کمک کننگک اوپارے کہ گوادر شپ یارڈ آن بلوچستان اٹ روزگار نا بھلو وارخواہی اس فراوان مریک و ہزار آ مخلوق ءِ روزگار دوبریک و بلوچستان نا احساس محرومی چٹک گوادر شپ یارڈ کون آ ڈٹ آتیان بلوچستان مالی خودانحصاری نا کنڈآکاہک وزیراعلیٰ بلوچستان جام کمال خان پارے کہ ہندی بندغ آتے گوادر آن بیدخل کننگپک بلکن اوفتا زند انا آب ءِ بڑز کننگ کن پائیدار بنداو تیا داوڑنا ڈٹ ٹہیفنگک ہراڑآن گوادر نا ہندی مخلوق براہ راست فائدہ ہرفنگ کے۔
