اسلام آباد۔ 02 فروری (اے پی پی) وزیراعظم نا خصوصی کمکار جان جوڑی ڈاکٹر فیصل سلطان پارینے کہ پاکستان اینو چارشنبے نادے آن تینا اولیکو کوویڈ۔ 19 ویکسینیشن مہم نا بناءِ کیک ہراٹی فرنٹ لائن ہیلتھ ورکرآتے اولیت تننگک۔ تینا اسہ انٹرویو اسے ٹی ڈاکٹر فیصل سلطان پارے کہ فرنٹ لائن ہیلتھ ورکرآتیان پد دا ویکسین ءِ ہمو بزرگ آتے تننگک ہرافتا وئی 60 سال آن زیات ءِ۔ اوپارے کہ کوویڈ۔ 19 نا ویکسینیشن رضاکارانہ مریک و نن کس ءِ ویکسین نا خور ہلنگ آ بیوس کپنہ۔ اوپارے کہ کورونا ویکسین غٹ سرکاری ہسپتال آتیٹی بے معاوضہ غان رسینگک وخت اس کہ فرنٹ لائن میڈیکل ورکر و بزرگ شاری تیکن ٹیکہ خلنگ کن ویکسین نا ہلہلہ ئی کاریم اٹ اتنگ نا بناءِ کننگانے۔ اوپارے کہ تدوک آ دے چین آن سینو فرم ویکسین نا اولیکو کھیپ ملک آ رسینگانے۔ فیصل سلطان مستی پارے کہ ایسٹرازینکا ویکسین نا 17 ملین و کووایکس نا شش ملین خور مارچ انا ایسر اسکان پاکستان آ سرمریک۔ اسہ سوج اسے نا ورندی ٹی اوپارے کہ حکومت 220 ملین بندغ آتیکن کوویڈ۔ 19 نا ویکسین ہلنگ کن 150 ملین ڈالر نا بنائی فنڈ جتا کرینے۔ اوپارے کہ پاکستان پین ویکسین ہلنگ کن مہالو آن چندی جہانی کمپنی تتون رابطہ ٹی ءِ ۔ اومستی پارے کہ حکومت 2021ء نا اولیکو سہ ماہی ٹی 70 درسد آبادی ءِ ویکسین تننگ کن سنبرینگوک ءِ۔ اوپارے کہ اولیکو ریسہ ٹی فرنٹ لائن ہیلتھ ورکر و بزرگ شاری تا ویکسینیشن آن پد الس ءِ ویکسی نیشن رجسٹریشن کن 1166 نمبر ءِ فعال کننگک۔
