اسلام آباد۔ 02 فروری (اے پی پی) ڈپٹی چیئرمین سینیٹ سلیم مانڈوی والا نا کماشی ٹی سینیٹ نا ہاؤس کمیٹی نا دیوان اٹی پارلیمنٹ نا باسک آتیکن پوسکن آ لاجز آتا تفنگ نا معاملہ غا سجفنگا، کمیٹی ڈٹ انا پی سی ون و پری کوالیفکیشن نا رپورٹ جمع کرفنگ نا پارت کرے۔ سلیم مانڈوی والا پارے کہ ہفت سال مست پوسکن آ لاجز جوڑ مسکہ ہرا داسکان جوڑ متنے، سی ڈی اے کمامدارآک حوال اٹی کمیٹی ءِ معلومدار کریر کہ داسہ داڑآ کاریم نا بناءِ کننگ کن ایم او یو آ دستخط کننگانے، بلاک اے بی سی و ڈی آ سول ورک 100 درسد پورو مسنے، بلاک ای نا بیرہ سرونٹ کوارٹرز آ 100 درسد کاریم مسنے۔ دیوان ءِ پاننگاکہ پوسکن آ لاجز اٹی گچین شہرت تخوک کمپنی تیان لفٹ انا خلنگ کن است خواہی نا درشانی نا درخواست طلب کننگانے۔ ڈپٹی چیئرمین سینیٹ پارے کہ سی ڈی اے ءِ دا معاملہ غان مُر تخنگے، متکن آ معاہدہ چٹانے داسہ پوسکن آ معاہدہ مننگ ءِ۔ اوپارت کرے کہ لفٹ و ایئرکنڈیشنڈ سسٹم ءِ متکن آ معاہدہ غان اینک کننگے، کمیٹی ءِ سول، مکینکل و الیکٹریکل ورک انا غٹ سرجم آتے فراوان کننگے۔ ڈپٹی چیئرمین سینیٹ سلیم مانڈوی والا پارے کہ سی ڈی اے نا الیکٹریکل اسٹاف کاریم کپننگ ءِ وپارلیمنٹ نا باسک آک تکلیف اٹی ءُ، واٹر ٹریٹمنٹ پلانٹ و جنریٹرنا معاہدہ نا جتا ڈٹ بندی کننگے۔ سینیٹ ہاؤس کمیٹی پارے کہ تفوک آ کمرہ غاتا ماڈل اٹ کمرہ ٹی پنکھالائٹ نا زی آ خلنگانے۔
