اسلام آباد۔ 02 فروری (اے پی پی) جہانی مالیاتی فنڈ(آئی ایم ایف) تینا رپورٹ اٹی پارینے کہ کوویڈ۔ 19 نا منفی زرگزرانی اثرآتے کم کننگ کن 2020 نا آخیریکو سہ ماہی ٹی مچ آ دنیا نا چندی حکومت آک الس و کاروبار کن 2.2 کھرب ڈالر نا مالی کمک فراوان کرینو۔ آئی ایم ایف نا رپورٹ نا رداٹ 2020ء نا ایسر اسکان مچ آ دنیا نا حکومت آک کورونا دین انا زرگزرانی نسخان تے کم کننگ کن جم وڑاٹ راج انا زہمی تپہ و کاروبار تیکن جم وڑاٹ 14 کھرب ڈالر نا مالی کمک کرینو۔ رپورٹ نا رداٹ ستمبر 2020ء اسکان مالی کمکاری نا جہانی کچ 11.8 کھرب ڈالر ریکارڈ کننگاسس۔ ہنداوڑ بیرہ مسہ تُو اٹی چندی ملک آتا حکومت آتا کنڈآن دا بابت 2.2 کھرب ڈالر نا مالی امداد کرینو۔ آئی ایم ایف نا رداٹ مچ آ دنیا ٹی تروک آ مالی کمکاری ٹی 7.8 کھرب ڈالر کٹیا ٹی کمتی نا اثرآتے زائل کننگ کن فراوان کننگانے۔ وخت اس کہ چندی ملک آتا کنڈآن 6 کھرب ڈالر چندی گارنٹیز، وام یا ایکویٹی نا مد اٹی تننگانے۔ یات سلے کہ کوویڈ۔ 19 نا اثرآتے کم کننگ کن دنیا نا چندی ملک آتا حکومت آتا کنڈآن تینا زرگزرانی کچ انا رداٹ مالی کمک تننگانے۔
