وزیراعلیٰ بلوچستان جام کمال خان نا است ہسونی نا درشان
کوئٹہ۔ 02 فروری (اے پی پی) بلوچستان نا علاقہ اوتھل نا خڑک پنجگور آن کراچی آ ہنوک آ مسافر کوچ ءِ شکست، دہ بندغ زوال وخت اس کہ ہشت بندغ ٹھپی مسنو۔ زوال و ٹھپی مروک آتیٹی چناو زالبول ہم اوار ارے۔ انتظامیہ نا رداٹ دوشنبے و سے شنبے نا نیامی نن آ بلوچستان نا علاقہ اوتھل وایارو نا ہند آ پنجگور آن کراچی آہنوک آ مسافر کوچ ترند رفتاری نا سوب آن چپی مس ہراٹی شکراللہ، امیر بخش، سلمان اکبر، بی بی لعل گل، بی بی مریم، بی بی انساء، بی بی سائرہ، فاطمہ بیگم تون اوار ایلوفک زوال کریر وخت اس کہ ٹھپی مروک آتیٹی اعجاز احمد، محمد امتیاز، خان محمد، بی بی شیرگل ، محمد ادریس، فیضان، مورداد بی بی و شکراللہ ٹھپی مسر۔ ایدھی و انتظامیہ ءِ حوال ملنگ تون واقعہ نا جاگہ غا سرمرسا لاش و ٹھپی تے اوتھل ہسپتال آ گدریفنگا۔ داکان بیدس وزیراعلیٰ بلوچستان جام کمال خان اوتھل نا خڑک پنجگور آن کراچی آ ہنوک آمسافر کوچ انا چپی مننگ آن نہادی انسانی جان تا زیان آ است ہسونی نا درشانی ءِ کرے۔ وزیراعلیٰ پارے کہ مشکل نا داساہت اٹ غمزدہ خاہوت تون تفوک اُن۔ شکست اٹ ٹھپی مروک آ مسافر آتے گچین طبی آسراتی تننگے۔ وزیراعلیٰ جام کمال خان زوال کروک آتا بندغ آتا خاہوت آتون ہمدردی و ہڑزخواہی کرے۔
