اسلام آباد۔1فروری (اے پی پی): وزیر ءِ درئی کار شاہ محمود قریشی ءَ گوشت کہ چین ءَ یک رند ءِ پد ءَ پاکستان ءِ گوما بے دروریں دوستی ءِ درشان کتگ۔ کورونا ءِ ھلاپ ءَ گامگیج آنی اندر ءَ چین پاکستان ءِ گوما ھمکوپگ ءَ اوشاتگ۔ چین ءَ پاکستنا ءَ را پنچ لکھ ویکیسن ٹیکی داتگ۔ اے گپ آئی ءَ دو شمبے ءِ روچ ءَ چین ءِ نیمگ ءَ روان داتگیں 5 لکھ ڈوز ءِ کورونا ویکیسن ءِ اولی بھر ءِ دست گرگ ءِ ھاترا نور خان ائیر بیس ءِ سر ءَ برجم داشتگیں مراگش ءَ گوں گشتانک دیان ءَ کت۔ ایشی ءَ چہ پیسر پاکستان ائیر فورس ءِ ھاسیں بالیگ ویکیسن ءَ را چین ءَ آرگ ءُ ادا اسلام آباد پج ات۔ وزیر ءِ درئی کار شاہ محمود قریشی ءُ ھاسیں کمکار جام سلامتی ڈاکٹر فیصل سلطان ءَ ھور این سی او سی ءُ محکمہ جان سلامتی ءِ کارندہ ھم ائیر پورٹ ءِ سر ءَ ساڑی اتنت۔ چین ءِ سفیر نونگ رونگ ءَ کورونا ویکیسن ءِ درمان وزیر ءِ درئی کار ءِ ھوالگ ءَ کت انت۔ وزیر ءِ درئی کار ءَ گوشتانک دیان ءَ گوشت کہ من ءَ سک باز وشی بوھگ ءَ انت کہ چین ءَ وتی دوستی ءِ درور یک رند ءِ پد ءَ نکش کتگ انت، چین ءُ پاکستان ءِ دوستی بے درور ءُ نمیران انت۔
