اسلام آباد۔ 01 فروری (اے پی پی) اقوام متحدہ نا ادارہ پناہ گزین یو این ایچ سی آر کورونا دین آن ودی مروک آ حالیت آتا رداٹ زہمی حقدار اوغان باہوٹ آتیٹی 75 ہزار روپئی نا ہلہلہ ئی کمکی زر انا بشخنگ نا کاریم ءِ پورو کرے۔ پاکستان 1.4 ملین آن زیات رجسٹرڈ اوغان باہوٹ آتا مہمانداری ءِ کننگ ءِ۔ کوویڈ۔ 19 نا سوب آن باہوٹ آک تینا ذریعہ معاش کٹیا کننگ نا قابل سلتنو ہراڑآن اوفتا ہڑدے ئی روزگار کٹیا کننگ نا صلاحیت بھاز بے وڑ زہمی مس۔ ہرانا ردعمل اٹ یو این ایچ سی آر مئی 2020ء ٹی ہلہلہ ئی زر آتا بشخنگ نا پروگرام نا بناءِ کریسس۔ دا پروگرام حکومت پاکستان نا احساس راجی رکھ پروگرام آنبار ءِ ہرانا رداٹ حقدار پاکستانی خاہوت آتے اسہ وار 12 ہزار روپئی نا نغد امداد فراوان کننگا۔ یو این ایچ سی آر نا کمک اٹ نادرا باہوٹ خاہوت آتے خور، جان جوڑی، تعلیم تون اوار اوار کرایہ و ہن و بر کون آ اہم گرج آتے پورو کننگ کن دا امدادی زر ءِ تننگانے۔ یو این ایچ سی آر نا نغد امدادی پروگرام وزارت سیفران، پاکستان پوسٹ، اوغان باہوٹ کمشنر، شریدار این جی او و باہوٹ والنٹیرز اینڈ کمیونٹی لیڈر نیٹ ورک انا شریداری اٹ بناءِ کننگاسس۔ اسہ پریس ریلیز اسے ٹی پاننگانے کہ حقدار آتا آب ءِ کاریم اٹ اتسا دارضاکار باہوٹ نیٹ ورک غٹ آن زیات ضرورت مند پناہ گزین آتا پیدواری ءِ کننگ نا عمل اٹ کمک کرے۔ پاکستان اٹ یو این ایچ سی آر نا نمائندہ نوریکو یوشیڈا پارے کہ 75000روپئی نا دا امداد آن پناہ گزین خاہوت آتیان اسہ خاہوت اس ہم دُن ءُ اف ہر ادا نغد امداد آن سلوئے انتئے کہ کوویڈ۔ 19 نا دین اسٹ اسے ٹی ہم پرخ کتو وغٹ اکن اسہ وڑ مشکل ودی مس۔ اوپارے کہ حکومت پاکستان و جہانی برادری نا کمک اٹ داامداد آن نئے بیرہ باہوٹ آتے باوقار وڑاٹ تینا گرج آتے پورو کننگ اٹ کمک رسینگانے بلکن داڑآن یکجہتی نا اسہ کلہو اس ہم رسینگانے۔ یو این ایچ سی آر نا ہلہلہ ئی نغد پروگرام نا رداٹ پاکستان اٹ کل 450000اوغان باہوٹ آتا امداد ءِ کننگانے و ہر مسٹ آن اسہ اوغان باہوٹ ئ، داامداد آن فائدہ رسینگانے۔
