اسلام آباد۔ 01 فروری (اے پی پی) ہندا مالی سال انا اولیکو ششماہی ٹی ملک اٹی 708 ملین ڈالر نا براہ راست درملکی زرکاری کننگا، ہندا مالی سال انا اولیکو ششماہی ٹی ملک اٹی کروک آ درملکی زرکاری نا مقابلہ ٹی منافع غاتا پیشن نا ملک گدریفنگ 26 درسد زیات مسنے۔ اسٹیٹ بینک آف پاکستان، ایس بی پی نا رپورٹ نا رداٹ برجامالی سال اٹی جولائی آن دسمبر 2020ء ٹی پاکستان اٹی کروک آ درملکی زرکاری آن دوئی کٹیا تاپیشن نا ملک گدریفنگ 892 ملین ڈالر اسکان ودا۔ ہنداوڑ برجامالی سال انا بنائی شش تُو اٹی ملک اٹی کروک آ درملکی زرکاری نا مقابلہ ٹی کٹیا تا پیشن نا ملک گدریفنگ 184 ملین ڈالر یعنی 25.98 درسد زیات مسنے۔ ایس بی پی نا رداٹ ہندا مالی سال اٹی فوڈ گروپ نا کنڈآن غٹ آن زیات کٹیاگدریفنگانے و جولائی آن دسمبر 2020ء ٹی شعبہ ٹی کروک آ درملکی زرکاری آن دوئی 171.5 ملین ڈالر نا کٹیا پیشن نا ملک گدریفنگانے وخت اس کہ تدوک آ مالی سال نا ہندا وخت اٹی شعبہ نا کنڈآن 53 ملین ڈالر نا کٹیا پیشن نا ملک گدریفنگاسس۔ ایلو کنڈآ مالیات نا بشخ (بینکس) اٹی کروک آ درملکی زرکاری آن دوئی کٹیاتا گدریفنگ تدوک آ مالی سال انا اولیکو ششماہی ٹی 125.5 ملین ڈالر مسوس ہرا ہند امالی سال اٹی 122.5 ملین ڈالر اسکان کم مسنے۔ مرکزی بینک انارداٹ مواصلات نا بشخ اٹی دوئی کٹیا تا پیشن نا ملک گدریفنگ 33 ملین ڈالر نا مقابلہ ٹی 119.3 ملین ڈالر اسکان ودا وخت اس کہ ٹیلی کمیونیکیشن نا بشخ اٹی کوویڈ۔ 19 نا سوب آن 105 ملین ڈالر نا کٹیا پیشن نا ملک آ گدریفنگانے۔ داکان بیدس ٹرانسپورٹ و تیل و گیس انا پٹنگ نا بشخ آن کٹیا تا گدریفنگ تدوک آ سال انا 139و112 ملین ڈالر نا مقابلہ ٹی نمان حداسکان 74 و 69 ملین ڈالر اسکان کم مسنے۔ تمباکو و سگریٹ نا صنعت نا کنڈآن درملکی زرکاری آ دوئی کٹیا تا پیشن نا ملک گدریفنگ 35 ملین ڈالر نا مقابلہ ٹی 76.5 ملین ڈالر اسکان ودانے۔
