کوئٹہ۔ 29 جنوری (اے پی پی) قومی احتساب بیورو بلوچستان اہم سرکاری عہدہ غاتیا تعینات آفیسر آتا کنڈآن سرکاری ڈغار تیا غیر کانودی کوزہ و اوفتے مارکیٹ اٹ بہاکننگ نا ڈوہ اٹ پٹواری، تحصیل میونسپل آفیسر تون اوار 7 بااثر بندغ آتا برخلاف ریفرنس احتساب عدالت کوئٹہ ٹی دائر کرینے، ترجمان نیب بلوچستان نا رداٹ نیب انا جاست وپاست اٹی داہیت مون آ بس کہ سال 1982ء ٹی ضلع سبی نا ہنکینی دلی جان گشکوری نا درخواست آ ہمووخت آ ریونیوکمامدار آک میونسپل کمیٹی نا ڈغار آ اوفتے خشت آتا بھٹہ اس جوڑ کننگ نا موکل تس۔ دارداٹ دلی جان گشکوری نا کنڈآن میونسپل کمیٹی تون نئے تو اقرار نامہ اس کننگا و نئے سرکار ءِ خراج نا حالیت اٹ ڈغار نا اجارہ ادا کننگا۔ اوکان پد 2010اٹی دلی جان نا مار محمد اسلم، مسکوہی کونسلر سبی ٹی ایم او سبی آزاد خجک ءِ دا غیر کانودی کوزہ کروک آ ڈغار نا بابت تصدیقی سرٹیفکیٹ جاری کننگ نا درخواست تس۔ ہراڑآ اختیار آتا ناروا کاریم اٹ اتسا ٹی ایم او تصدیقی سرٹیفکیٹ جاری کرے، اوکان پد عبدالحق پٹواری نا اواری اٹ 786213 مربع فٹ ڈغار دلی جان گشکوری نا مار محمد اسلم، محمد اکرم، اعظم، مظفر و جمیل نا پن آ منتقل کننگا۔ محکمہ پولیس ، کشت وکشار، بی اینڈ آر و نادرا ٹی بڑزکو سرکاری عہدہ غاتیا تعینات مارک ہندا بڑزکو سرکاری ڈغار مخلوق تون درو کرسا پلاٹ آتا حالیت اٹ مارکیٹ اٹ سودا کریر۔ قومی احتساب بیورو بلوچستان نا جاست وپاستی ٹیم قومی خزانہ ءِ 11 کروڑ 79 لکھ روپئی نسخان تننگ نا دوبہ ٹی پٹواری، ٹیم ایم او تون اوار ہفت بندغ آتا برخلاف ریفرنس احتساب عدالت کوئٹہ ٹی دائرکرینے۔
