کوئٹہ۔ 29 جنوری (اے پی پی) صوبائی وزیر داخلہ میر ضیاء اللہ لانگو نا کماشی ٹی امن و ایمنی و اسد خان برمتہ کیس انا بابت بڑزکو کہولی دیوان اس مس۔ دیوان اٹی صوبائی وزیر کشت وکشار زمرک خان اچکزئی، باسک صوبائی اسمبلی اصغر خان اچکزئی، باسک صوبائی اسمبلی شاہینہ کاکڑ، ایڈیشنل چیف سیکرٹری داخلہ حافظ عبدالباسط، ڈی آئی جی کوئٹہ محمد اکرام اظہر و ایلوتعلقدار کمامدارآک ساڑی ئسر۔ دیوان اٹی تعلقدار کمامدارآتا کنڈآن تینا تینا محکمہ غاتا کارکڑد و اسد برمتہ کیس آخبت نا لائحہ عمل و کروک آ گام گیج آتا حوال تننگا۔ دیوان اٹی ساڑی آ حالیت آتے مون آ تخسا امن و ایمنی ءِ برقرار تخنگ، برمتہ برائے تاوان نا سدباب و بے سہب کننگ نا عزم انا درشانی ءِ کننگا۔ دیوان اٹی تران کرسا صوبائی وزیر داخلہ میر ضیاء اللہ لانگو پارے کہ برمتہ برائے تاوان کون آ ڈوہ تا توننگ کن سخت گام گیج کروئی مریک۔ و الس ءِ سیکورٹی فراوان کننگ کن ہروڑ نا گام گیج کننگک۔ اوپارے کہ الس نا ویل آتے اوفتا درگہ غا ایسر کننگ ننا اولیت آتیٹی سرفہرست ءِ۔ وزیر داخلہ دیوان اٹی پارے کہ برمتہ برائے تاوان نا واردات آتے اسُل سگنگ پننگک۔ دیوان اٹی وزیر کشت وکشار زمرک خان اچکزئی پارے کہ برمتہ نا واردات آتا سد درسد چٹفنگ ءِ پک کننگے۔ اوپارے کہ امن و ایمنی و الس نا جان و مال انا رکھ حکومت نا زمواری ءِ۔
