مچ آ دنیا ٹی 60 ہزار نا خڑک متکن آ ڈیم تیان آبادی تے بھلوخطرہ اس مون تروک ءِ، اقوام متحدہ

اسلام آباد۔ 28 جنوری (اے پی پی) اقوام متحدہ یونیورسٹی نا انسٹیٹیوٹ دِیر، ماحولیات و جان جوڑی ئسک پارینو کہ مچ آ دنیا ٹی 60 ہزار نا خڑک متکن آ ڈیم تیان آبادی تے بھلو خطرہ اس مون تروک ءِ۔ مستین اٹ تفوک آ دا بھلا ڈیمک زیات رکھ سلتنو۔ اقوام متحدہ یونیورسٹی نا انسٹیٹیوٹ دِیر، ماحولیات و جان جوڑی نا رپورٹ نا رداٹ مچ آ دنیا ٹی تفوک آ متکن آ بھلا ڈیم تیان بھلو خطرہ اس مون تروک ءِ۔ 2050اسکان تینا وئی ءِ پورو کروک آ داوڑنا ہزار آ ڈیم تیان دنیا نا کم و ود نیمہ آبادی کن مشکل ودی مننگ کیک۔ رپورٹ نا رداٹ مچ آ دنیا ٹی 59 ہزار آن زیات بھلا ڈیم 1930 آن 1970 اٹی تفنگاسر ہرافتا طبعی وئی انا کساس 50 آن 100 سال خلنگاسس۔ پٹ وپولی رپورٹ نا رداٹ شریک مصنف و انسٹیٹیوٹ نا ڈائریکٹر ولادی میر سمیکٹن پارینے کہ جہانی کہول آ دا اسہ بھلو خطرہ اسے ہراڑآ نن چکار کپننگ اُن۔ اوپارے کہ تینا وئی ءِ پورو کروک و خطرہ نا گواچی دا ڈیم تا کچ اٹ ہرسال و ہردہائی ٹی ودکی مننگ ءِ۔ اوپارے کہ جُوان ڈیزین، آب اٹ تفنگ و گچین خیال تخوک ڈیم کم و ود اسہ سد سال اسکان ہی کاریمی و رکھ مننگ کیرہ ولے مچ آ دنیا ٹی تفوک آ زیات تر بھلا ڈیمک دا آب آتیا پورو سلپسہ۔ اوپارے کہ تدوک آ اِرادہائی ٹی موسمیاتی بدلی، زیات پِر و زمی جمب پین پین آن امریکہ، بھارت، برازیل، اوغانستان تون اوار دنیا نا ایلو ملک آتیٹی بھلا ڈیم تے بھلو نسخان اس مسنے۔ اوپارے کہ جہانی برادری ءِ مرے کہ دنیا نا کم و ود نیمہ آبادی ءِ دا سوب آن مون تروک خطرہ غاتا بابت جامع حکمت عملی نا رداٹ گام گیج کے۔