کورونا ویکسین نا چین اتون چلینگوک آ ٹرائل پورو، منہ دے اٹی بھرمک بریرہ، ڈاکٹر یاسمین راشد

راولپنڈی۔ 28 جنوری (اے پی پی)ڈاکٹر یاسمین راشد پارینے کہ کورونا ویکسین نا چین اتون چلینگوک آ ٹرائل پورو مسنے، منہ دے اٹی بھرمک بریرہ، اولیکو ریسہ ٹی فرنٹ لائن ورکرآتے ویکسین خلنگک، پنجاب اٹی کورونا دین آن مرک آتا کچ اٹی کمتی مسنے، کورونا ویکسین ءِ صوبہ غاتیٹی امر بشخوئی ءِ اینو دیوان اٹی فیصلہ کننگک۔ داہیت آتے وزیر جان جوڑی پنجاب یاسمین راشد راولپنڈی انسٹیٹیوٹ آف یورالوجی ٹی میڈیا تون گپ وتران کرسا کرے۔ اوپارے کہ پنجاب اٹی 52 لکھ جان جوڑی کارڈ بشخنگانے، کارڈ ان ڈور آسراتی تیکن ءُ۔ کارڈ آ فری ڈائیلسزنا آسراتی ہم میسر مریک وخت اس کہ کارڈ آ ان ڈور ایمرجنسی نا دوائیک مفت ءُ۔ وزیر جان جوڑی پارے کہ جان جوڑی کارڈ آن 7 لکھ 20 ہزار روپئی اسکان درمان نا آسراتی مریک۔ اوپارے کہ اِراکروڑ 93 لکھ خاہوت آتے خاہوت ءِ کارڈ تننگک۔ کارڈ آن پینل آ ساڑی نجی ہسپتال آتیٹی ہم درمان کرفنگ مریک۔ خیبرپختونخوا ٹی غٹ خاہوت آتے جان جوڑی کارڈ فراوان کننگا۔ وزیر جان جوڑی مستی پارے کہ وزیراعظم خواہک پاکستان آسودہ ریاست اس مرے، نن انسان تا جان جوڑی آ زرکاری کننگ خوانہ۔