وزیر داخلہ شیخ رشید احمد تون کویت نا نائب وزیر خارجہ علی سلیمان السعید نا اوڑدہی، پاکستانی شاری تیکن ویزا نا پابندی ءِ اینک کننگ نا بابت پیش رفت آ است جمی نا درشان

اسلام آباد۔ 28 جنوری (اے پی پی) وزیر داخلہ شیخ رشید احمد تون کویت نا نائب وزیر خارجہ علی سلیمان السعید اوڑدہی کرے۔ پنچ شنبے نادے آ وزارت داخلہ نا کنڈآن جاری بیان نا رداٹ اوڑدہی ٹی پاکستان و کویت نا نیام اٹ تعلقداری تے ودفنگ و تین پہ تینی است خواہی نا باندات آ گپ وتران کننگا۔ اوڑدہی ٹی پاکستانی شاری تیا کویت نا ویزا نا پابندی ءِ اینک کننگ نا بابت پیش رفت نا جاچ ءِ ہلنگا و ویزانا بابت است بڈ پیش رفت آ ہڑتوم آ راہشون تا است جمی نا درشانی ءِ کننگا۔ اوڑدہی ٹی کویتی امیر نا کنڈآن وزیر داخلہ شیخ رشید احمد ءِ کویت نا دورہ نا سلہ خلک و پارے کہ پاکستان و کویت نا نیام اٹ سیکورٹی نا بابت پین کمکاری ءِ ودفنگ نا گرج ءِ۔ پاکستان وکویت نا نیام اٹ واپار نا بھاز اسکوپ ءِ۔ عملی گام گیج زوت کننگ نا گرج ءِ۔ پاکستان و کویت ناسیکورٹی نا چیلنج آک مشترکہ ءُ۔ کویتی نائب وزیر خارجہ پارے کہ ای سمجھیوہ دا چیلنج آتون مون تننگ کن وزارت داخلہ کلیدی کڑد ادا کننگ کیک۔ داوخت آ وزیر داخلہ شیخ رشید احمد پارے کہ پاکستان وکویت نا نیام اٹ تعلقداری کیہی دہائی و کیہی نسل آتیا تالان ءِ۔ ہڑتوم آ ملک آتا مخلوق آتا نیام اٹ است انا رشتہ ءِ۔ اوپارے کہ کویت نا دورہ ءِ کننگ نا سلہ کنکن شرف نا ہیت اسے۔ بطور وزیر حوالکاری و وزیر زرکاری کویت نا دورہءِ کرینٹ۔ کویتی نائب وزیر خارجہ کویت ڈل انا عزت افزائی نا منت واری ءِ ہرفے و نائب وزیر خارجہ شیخ رشید احمد ءِ وزیر داخلہ نا قلمدان سنبھالنگ آ مبارکبادی ہم تس۔