کس ءِ ملک انا امن و ایمنی ءِ خراب کننگ نا موکل تفنہ، بنجائی وزیر داخلہ شیخ رشید احمد نا پشاوراٹی دیوان آن تران

پشاور۔ 27 جنوری (اے پی پی) بنجائی وزیر داخلہ شیخ رشید احمد پارینے کہ دشمن تے  ملک انا امن و ایمنی ءِ خراب کننگ نا موکل تفنہ، خیبرپختونخوا ءِ غٹ المی وسیلہ ایتنہ۔ داخیال آتا درشانی ءِ او تینا دورہ پشاور اٹی وزیراعلیٰ محمود خان تون اسیجائی وڑاٹ امن و ایمنی نا بابت دیوان نا کماشی ءِ کرسا کرے۔ دیوان اٹی چیف سیکرٹری خیبرپختونخوا ڈاکٹر کاظم نیاز، آئی جی خیبرپختونخوا پولیس ڈاکٹر ثناء اللہ عباسی و ایلو کانود نافذ کروک آ ادارہ غاتا کمامدارآک بشخ ہلکر و وزیرداخلہ ءِ صوبہ ٹی امن وایمنی نا حالیت آتیا حوال تننگا۔ بنجائی وزیر داخلہ شیخ رشید پارے کہ صوبہ غاک امن و ایمنی نا حالیت آتیٹی فرنٹ لائن نا کڑد ءِ ادا کریر، امن و ایمنی دوئی کننگ کن نن بھلو قربانی تسونن، اسہ دشمن اسے ہم ملک انا امن و ایمنی ءِ خراب کننگ نا موکل تفنہ۔ دیوان اٹی خیبرپختونخوا و قبائلی ضلع غاتیٹی امن وایمنی نا جم حالیت آتا جاچ ءِ ہلنگا، صوبہ بشمول اوار کروک ضلع غاتیٹی امن نا تازہ حالیت آتیا حوال تننگا۔ بشخ ہلوک آک امن و ایمنی نا جم حالیت آتیا است جمی نا درشانی ءِ کریر۔ امن و ایمنی نا حالیت آتے برجاتخنگ و پین گچین نا چندی سلاہ تیا ہم سجفنگا۔