اسلام آباد۔ 27 جنوری (اے پی پی) وزیراعظم نا کمکار جان جوڑی ڈاکٹر فیصل سلطان پارینے کہ ملک آن پولیو نا چٹفنگ حکومت نا اولیت آتیٹی اوار ءِ حتیٰ کہ حکومت کورونا نا جہانی دین کون آ سخت حالیت آتیٹی ہم پولیو تور مہم آتے سرسہبی اٹ اڈتننگ ءِ حکومت جاپان پاکستان اٹ پولیو نا چٹفنگ کن 4.57 ملین ڈالر نا امداد تننگ ءِ، ہندا گرانٹ آن 23.66 ملین ویکسین ڈوز ہلنگک۔ دا گرانٹ نا کمک اٹ 2021 اٹی مروک آ پولیو تور مہم آتیٹی 5 سال آن کم وئی نا چناتے پولیو ویکسین نا فراوانی ممکن مننگ کیک۔ دا بابت حکومت جاپان، یونیسیف و جاپان انٹرنیشنل کارپوریشن ایجنسی(جائیکا) نا نیام اٹ معاہدہ غا دستخط مسنے۔ جاری مروک آ بیان اٹی اوپارے کہ حکومت پاکستان، جاپانی حکومت و جاپانی الس نا پاکستان نا ہر چنااسکان پولیو ویکسین نا رسینگ ءِ ممکن کننگ کن تروک آ دا وخت آ گرانٹ نا بابت منت واری ءِ ہرفک۔ اومیت ءِ کہ نن غٹ اواری اٹ بھاز زوت نئے بیرہ پاکستان بلکن مچ آ دنیا ءِ پولیو آن پاک کننگ اٹ سرسہب مرینہ۔ پاکستان اٹ تعینات جاپان نا سفیر میٹسوڈا کونی نوری کورونا دین انا تالانی آن پد ہم پڑی کنفوک آ پولیو نا ہراول ورکرآتے اوفتا نرزوری و سخت کوشست آتے خراج تحسین پیش کرے۔ اوپارے کہ حکومت جاپان، یونیسیف تون اسیجائی کوشست آتے اٹ پاکستان آن پولیو نا چٹفنگ کن پاکستانی الس تون تینا کمکاری ءِ برجاتخک۔ داوخت آ جائیکا نا سروک شیگے کی فوروٹا پارے کہ کورونا دین آن پد اہم پولیو تور مہم آتا اڈتننگ حکومت پاکستان نا اسہ بھلو کارنامہ اسے۔ دا گرانٹ نا کمک اٹ یونیسیف پولیو دین آن زہمی علاقہ غاتیٹی رہینگوک آ چناتیکن پولیو آن بچفنگ نا ویکسین ہلیک ۔ دُن تو پولیو آن پورو خلاصی دوئی کننگ اسہ مشکل ءُ مرحلہ اسے ولے نن غٹ واری اٹ دا ہدف نا زوت آن زوت دوئی کننگ کن تینا پبی کوشست آتے برجاتخنہ۔ سروک یونیسیف ایدہ گرما حکومت پاکستان نا کوشست آتا ستاءِ کرسا پارے کہ تدوک آ سال کورونا نا سوب مارچ آن جولائی اسکان 39 ملین چناتے پولیو آن بچفنگ نا پڑی تننگ متو ہراڑآن چناتا قوت مدافعت اٹ کمتی بس۔ ولے پولیو پروگرام نا جہدآن جولائی آن پد دُوارہ پولیو تور مہم آتا اڈتننگ ممکن مس۔ اومستی پارے کہ حوکمت جاپان آن ملوک آ گرانٹ آن پولیو تور مہم آتیٹی گچینی بریک و چناتا قوت مدافعت اٹی ودکی نا کمک اٹ پولیو نا چٹفنگ نا ہدف نا دوئی کننگ اٹ آسانی مریک۔ پاکستان ءِ ساڑی آ وخت اٹی پولیو نا چٹفنگ نا چرجوئی ٹی گیشتر چیلنج مون تروک ءِ۔ 19 جنوری 2021 اسکان نا حساب وکتاب نا رداٹ ملک اٹی پولیو نا 84 کیس مون آ بس ہرافتے ٹی بلوچستان آن 26، خیبرپختونخواآن 22، سندھ آن 22، و پنجاب آن 14 کیس رپورٹ مس۔ کورونا دین انا سوب مارچ آن جولائی 2020ء نا نیام اسکان مچ آ ملک اٹی پولیو تور مہم آتے اڈ تننگ متویسس ولے جولائی نا نیام آن پد مچ آ ملک اٹی دُوارہ پولیو مہم آتا بناءِ کننگا۔ حکومت جاپان 1996آن داتم اسکان پولیو نا چٹفنگ کن پاکستان پولیو پروگرام تون کمک کننگ ءِ۔ داٹی حکومت جاپان، یونیسیف نا کمک اٹ پاکستان ءِ 226.37 ملین ڈالر نا گرانٹ و وام تا کمک اٹ پولیو پروگرام کن امداد فراوان کرینے۔
