اسلام آباد۔ 27 جنوری (اے پی پی) وزیر خارجہ مخدوم شاہ محمود قریشی پارینے کہ پاکستان امن نا بحالی، جھیڑہ غاتیان بچنگ و سوگو شونداری نا ہدف آتا دوئی کننگ کن کثیر القومی کمکاری کن سنبرینگوک ءِ۔ داہیت ءِ او چارشنبے نادے آ اقوام متحدہ نا سیکرٹری جنرل ناامن فنڈاکن بڑزکو کہول انا ری۔ پلینشمنٹ کانفرنس آن تران کرسا پارے۔ وزیر خارجہ سیکرٹری جنرل نا امن فنڈ اٹی بیست ءُ پنچ ہزار ڈالر عطیہ کننگ نا پڑو ءِ کرسا پارینے کہ دا عہد اقوام متحدہ نا دنیا ٹی امن کن کوشست آتیکن ننا سیاسی، افرادی و مالی کمک ءِ برجاتخنگ نا عزم ءِ ظاہر کیک۔ وزیر خارجہ پارے کہ زیات تر پدتموک ملک آتیانبار پاکستان کورونا نا دین آن بھاز بے وڑ زہمی مسنے ہراڑآن ننا جان جوڑی نا نظام زور انا گواچی مس۔ ننا زرگزران زہمی و ننا مالی گنجائشت اٹی کمتی واقع مس۔ وزیر خارجہ پارے کہ فوجی و پولیس دستہ غاتا غٹ آن بھلا کچ تروک آ ملک انا وڑاٹ پاکستان ءِ امن نا اقوام متحدہ نا کوشست آتا تاریخ آ گمر ءِ۔ تدوک آ 60 آن زیات سال اٹ امن کن ننا دستہ غاک دنیا نا 4 براعظم تیٹی 46 آن زیات اقوام متحدہ نا امن مشن تیٹی خرن انگا بیرک ءِ چست کرینو۔ وزیر خارجہ اقوام متحدہ نا سیکرٹری جنرل نا قیام امن فنڈ انا حکمت عملی 2020-2024نا خیرمقدم ءِ کرے، ہراٹی جھیڑہ غاتیان بچنگ نا المی پلو آتیا چکار کننگانے۔ اواومیت ظاہر کرے کہ دا حکمت عملی ٹی جھیڑہ غاتا بنداوی سوب آتے ایسر کننگ کن گام گیج آتا کسر آوار مریک۔ دا جھیڑہ غاک ناانصافی و بے بریبری آن ودی مریرہ ہراٹی بنداوی انسانی حق انا لتاڑ خاص وڑاٹ درملکی کوزہ، نوآبادیاتی جور و ایلو قوم تا تسلط نا گواچی مخلوق ءِ اوفتا استصواب رائے نا حق تفننگ ہم اوار ءِ۔ وزیر خارجہ پارے کہ جھیڑہ غاتا شکار ملک آتیٹی ڈٹ آتیکن براہ راست مالی کمک ءِ برجاتخسا دا وسیلہ غاتے پین ذریعہ اٹ زرکاری نا دوئی کننگ کن قابل عمل ڈٹ آتا تیاری کن ہم کاریم اٹ اتنگ مریک ہرافتے ٹی کثیر القومی شونداری بینک، پرائیوٛٹ ایکویٹی و ساورن ویلتھ فنڈز اوار ءِ۔ پدتموک ملک آتیکن اسہ بھلو مشکل واڑاند اس واپاری بنداو تیا قابل عمل ڈٹ تیار کننگ نا اہلیت نا کمتی ءِ ہراڑآن جہانی زرکاری نا دوئی کننگ ممکن مفک۔ وزیر خارجہ پارے کہ قیام امن نا بنداوی اصول، نیشنل اونرشپ، برقرار بایدے مرے و ہندا اصول انا رداٹ قیام امن فنڈ انا زرکاری نا غٹ فیصلہ غاتا تعین مرے۔ انتئے کہ قوم تیٹی پائیدار امن ءِ پیشن آن مسلط کننگ مفک۔
