اسلام آباد۔ 27 جنوری (اے پی پی) چین پاکستان اقتصادی راہداری سی پیک نا دیکی الائنمنٹ نا 292 کلومیٹر مریس چار لین آ تالان ہکلہ ڈی آئی خان موٹروے ایم 14 نا تفنگ نا کاریم ترندی اٹ برجاءِ وخت اس کہ ڈٹ انا پوروی ہندا مالی سال انا آخیر اٹی جون اسکان گمانی ءِ۔ چارشنبے نادے آ اے پی پی تون گپ وتران کرسا نیشنل ہائی وے اتھارٹی، این ایچ اے نا اسہ عہدیدار اس پارے کہ چین پاکستان اقتصادی راہداری سی پیک نا دیکی الائنمنٹ نا 292 کلومیٹر مریس چار ولین آ تالان موٹروے آ تعمیراتی کاریم پنچ بشخ آتیٹی بشخنگانے۔ اوپارے کہ داوخت آ موٹروے نا یارک رحمانی خیل بشخ آ 93.6 درسد عملی پیش رفت مسنے دا ٹھیکہ میسرز این ایل سی ءِ تننگانے دا بشخ آ کاریم نا بنا جولائی 2019 ء ٹی مسوسس۔ رحمانی خیل کوٹ بلیاں سیکشن نا بارواٹی اوپارے کہ جائنٹ وینچرنا رداٹ دا بشخ انا کاریم ءِ میسرز ایس کے بی و کے این کے ءِ تننگانے۔ اوپارے کہ دا سیکشن ءِ اِرا پیکج آتیٹی بشخنگانے و داتم اسکان کم و ود 94.5 درسد کاریم پورو مسننے۔ دا سیکشن آ کاریم جولائی 2017ء ٹی بناکریسس۔ اوپارے کہ کوٹ بلیاں۔ تراپ سیکشن نا معاہدہ میسرز ایف ڈبلیو او ءِ تننگا و دانا کاریم اکتوبر 2016 ء ٹی بناکرے و داتم اسکان 88 درسد پیش رفت مسنے۔ تراپ پنڈی گھیب سیکشن نا معاہدہ میسرز لیمک و زیڈ کے بی ءِ جوائنٹ وینچر آ تننگا و دانا کاریم نومبر 2016 ء ٹی بناکریسس و داتم اسکان 66.3 درسد کاریم پورو مسنے۔ پنڈی گھیب ہکلہ سیکشن نا بارواٹی اوپارے کہ داتم اسکان دا سیکشن آ60.9 درسد پیش رفت مسنے۔
