اسلام آباد۔ 26 جنوری (اے پی پی) وزیر خارجہ شاہ محمود قریشی پارینے کہ بھارت اٹی مسلمان، بنگالی، دلت اسٹ اس ہم رکھ اف۔ اینو نا بھارت اٹی سیکولرازم چٹسا و ہندوتوا سوچ مون آ برسا نظر بننگ ءِ۔ سے شنبے نادے آ تہار دے انا بابت اہم بیان اسے ٹی وزیر خارجہ پارے کہ اینو بھارت نا یوم جمہوریہ ءِ تہاردے انا وڑاٹ اڈتننگ انگ ءِ، اینو مچ آ دنیا ٹی کشمیریک برانز کننگ ءُ۔ شاہ محمود قریشی پارے کہ آئین نا رداٹ کشمیری تے تروک آ تشخص ءِ پُلنگانے، کشمیریک برانز کننگ ءُ کہ اوفتا بنداوی آئینی حق ءِ خلنگانے۔ اوپارے کہ جہانی میڈیا، انسانی حق انا رکھ اکن کاریم کروک آ جہانی تنظیمک، مقبوضہ جموں و کشمیر اٹی برجا انسانی حق انا بھلا خلاف ورزی و بھارتی بیدادی نا پڑدہ ءِ پاش کننگ ءُ، شاہ محمود قریشی پارے کہ اینو بھارت اٹی ریپبلک ڈے انا پریڈ اٹی ٹینک آک آخا ٹیکٹر آک نظر بننگ ءُ۔ اینو ہندوستان نا بزغر آک دہلی نا کنڈآ مارچ کننگ ءُ، شاہ محمود قریشی پارے کہ بھارت سرکار نا منفی پالیسی تا سوب آن بھارت نا زرگزران ناحالیت آک بگڑینگ انگ ءُ۔ بھارت اٹی اینو اقلیت آک تینے بے رکھ محسوس کننگ ءُ۔ اوپارے کہ اینو بھارت اٹی مسلمان، بنگالی، دلت اسٹ اس ہم رکھ اف، بھارت اٹی جمہوریت نا جاگہ غا مون انگا کانود نافذ مننگ ءِ۔ شاہ محمود قریشی پارے کہ اینو نا بھارت اٹی سیکولرازم ڈبینگسا و ہندوتوا سوچ مون آ برسا نظر بننگ ءِ، بھارت نا رویہ غان، اونا مچ آ ہمسایہ غاک بدبیسہ ءُ۔ نیپال، چین، بنگلہ دیش غٹ اتون بھارت نا رویہ بدل مروک ءِ۔ وزیر خارجہ پارے کہ بھارت ہندا رویہ نا سوب آن ترندی اٹ تینا ہمسایہ ملک آتیان مُر مننگ ءِ۔
