اسلام آباد۔ 25 جنوری (اے پی پی) بنجائی وزیر اقتصادی امور خسرو بختیار پارینے کہ جہانی بینک پاکستان نا اہم شونداری شریدار ءِ و بینک پاکستان نا اقتصادی و راجی شونداری نا بشخ آتیٹی کمک فراوان کننگ ءِ۔ اوداہیت ءِ دوشنبے نادے آ داڑے پاکستان اٹ جہانی بینک انا کنٹری ڈائریکٹر ناجی بن حسائن تون اوڑدہی ٹی گپ وتران کرسا پارے۔ اوڑدہی ٹی پاکستان اٹی جہانی بینک انا کمک اٹ برجا ڈٹ آتیا گپ وتران کننگا۔ داوخت آ پاکستان و جہانی بینک انا نیام اٹ چندی بشخ آتیٹی کمکاری ءِ ودفنگ نا وارخواہی آہم گپ وتران کننگا۔ بنجائی وزیر پارے کہ جہانی بینک پاکستان نا اہم شونداری شریدار ءِ و بینک پاکستان نا اقتصادی و راجی شونداری نا بشخ آتیٹی کمک فراوان کننگ ءِ۔ اوپارے کہ پاکستان نا حکومت جان جوڑی، تعلیم، ہندی حکومت و کشاری بشخ انا شونداری آ چکار کننگ ءِ و ننا است خواہی ءِ کہ جہانی بینک دا بشخ آتیٹی پاکستان تون کمکاری ءِ پین مون آدے۔ جہانی بینک انا کنٹری ڈائریکٹر پارے کہ بینک پاکستان اٹ راجی و اقتصادی شونداری نا بشخ آتیٹی پاکستان تون کمک کننگ ءِ، اوبینک انا کنڈآن پاکستان اٹی کمکاری ءِ برجاتخنگ نا عزم انا درشانی ءِ ہم کرے۔ یات سلے کہ جہانی بینک انا کنڈآن پاکستان کن پوسکن آ کنٹری شریداری فریم ورک (سی پی ایف) نا تیاری نا رداٹ سلابتی عمل برجاءِ۔ جہانی بینک انا رداٹ 2022آن ہلیس 2026 اسکان نا مد اکن پاکستان تون پوسکن آ شریداری فریم ورک انا ٹہیفنگ نا رداٹ سلابتی عمل نا بناءِ کننگانے۔ فریم ورک اٹ پاکستان کن سٹریٹجک کمکاری نا خدوخال پیدوار مریک۔ جہانی بینک ہر 4 آن ہلیس پنچ سال آن پد باسک ملک آتیکن پوسکن آ کنٹری پارٹنر شپ فریم ورک اس تیار کیک ہراٹی ہر باسک ملک انا بدل مروک آ اولیت آتے اوار کننگک۔ جہانی بینک انارداٹ پوسکن آ فریم ورک نا ٹہیفنگ اٹ کلیدی شریدار، حکومتی کمامدار، پارلیمنٹرینز، نجی بشخ، سول سوسائٹی نا تنظیم بشمول زالبول و ورناتا پڑک، جہانی مالیاتی ادارہ، سفارتی کمیونٹی، میڈیا و تعلیم نا چاہندار آتون سلابت کننگ انگ ءِ۔ دا سلابت نا مسخت پاکستان نا اقتصادی و راجی چیلنج آتیا کلیدی شریدار آتا متنوع رائے و خیال آتیان آگاہی دوئی کننگ و اودے مون آ تخسا کمکاری نا عمل ءِ مون آ دننگ نا ءِ۔
