اسلام آباد۔ 25 جنوری (اے پی پی) این سی او سی پارینے کہ صوبہ غاک کوویڈ۔ 19 نا رکھی ویکسین تروک آتا تربیت ءِ پورو کننگ ءُ۔ دوشنبے نادے آ نیشنل کمانڈ اینڈ آپریشن سینٹر(این سی او سی) ءِ معلومدار کننگاکہ صوبہ غاک ویکسین ءِ خلنگ کن کوویڈ۔ 19 ویکسینیشن نا بابت ٹیچنگ ہسپتال، تحصیل و ڈسٹرکٹ ہیڈکوارٹرز ہسپتال آتا عملہ نا تربیت کم وود پورو کرینے۔ نیشنل کوآرڈینیٹر لیفٹیننٹ جنرل حموداززمان خان نا کماشی ٹی این سی او سی نا دیوان اٹی صوبہ غاتا مثبت و حساس حساب وکتاب، این پی آئیز یا طبی درمان آن بیدس کوویڈ نا گیگ بدل گام گیج آتیا عملدرآمد، ویکسین ٹیکہ خلنگ نا تیاری، ویکسین نا حکمت عملی و ایلو باندات آ گپ وتران کننگا۔ این سی او ءِ تینا حوال اٹی، صوبائی چیف سیکرٹریک و جان جوڑی نا سیکرٹری تتون اوار گلگت بلتستان و آزاد کشمیر نا کمامدارآک پاریر کہ کورونا دین آن بچفنگ نا پڑی کُنفنگ آن مست غٹ المی گام گیج کننگ انگ ءِ۔ چیف سیکرٹریک فورم ءِ آب اٹ آپریٹنگ وڑوڈول(ایس او پیز) و این پی آئی نا نافذ ءِ پک کننگ کن چست کروک آ گام گیج آتا بارواٹ ہم معلومدار کرے۔ اوتینا صوبہ و شار تیٹی مثبت تناسب نا بارواٹی ہم معلومدار کننگا۔ فورم ءِ پاننگاکہ بھلو کچ اسے ٹی جرمانہ عائد کننگانے وخت اس کہ ایس او پی تا عمل کپننگ آ ریسٹورنٹ، دوکان وکاروباری ہند آتے ہم بند کننگانے۔ فورم جم حالیت آتا ہم جاچ ءِ ہلک۔ فورم ءِ پاننگاکہ غٹ درملکی مسافر خاص کر برطانیہ و سویلی افریقہ غان بروک آتا بالی پٹ آتیا جانچ کننگ انگ ءِ۔ ہرابندغ آتیٹی کورونا دین انا مثبت ٹیسٹ بسوسس اوفتے قرنطیہ کننگ انگ ءِ۔ فورم ویکسینیشن نا پورو وڑوڈول، اونا دستیابی نا وخت، بشخنگ نا عمل و زیات تر ہمو علاقہ غاتیٹی ہم گپ وتران کریر ہراڑے اودے زوت آن زوت کاریم اٹ اتنگ مریک۔ فورم ۔ 19 ناجوڑ آتا سرسہب درمان ءِ پک کننگ کن ویکسینیشن نا آب اٹ ہلنگ آ ہم زور شاغار۔ فورم ءِ پاننگاکہ ہرا بندغ آتے ویکسین خلنگک اوفتا ریکارڈ ءِ تخنگک تانکہ ہرا حکومت ٹیکہ خلوک آ بندغ آتا ریکارڈ ءِ تینتون تخک تانکہ ہرافک پیشن نا ملک سفر کیرہ اوفتے اسہ کانودی دستاویز اس فراوان کننگ مرے۔
