اسلام آباد۔ 25 جنوری (اے پی پی) وزیر خارجہ مخدوم شاہ محمود قریشی پارینے کہ پی ڈی ایم اسہ غیر فطری و عارضی ءُ سیوت اسے، نن و ننا حلیف تحریک بے پتی نا سیاسی، جمہوری و پارلیمانی وڑاٹ مقابلہ ءِ کینہ و اوفتے شکست ایتنہ۔ علاقائی حالیت و ملکی سیاست نا بابت دوشنبے نادے آ تینا اسہ بیان اسے ٹی شاہ محمود قریشی پارے کہ پی ڈی ایم نا صف آتیٹی اختلاف پاش آن پاش مون آ بسنے۔ استیفہ غاتا معاملہ غا مسلم لیگ (ن) اٹ مریم نواز و شہباز شریف نا سوچ انا اختلاف غٹ انا مون آ بسنے۔ مولانا فضل الرحمان لانگ مارچ اٹ لگوک ئس ولے بلاول بھٹو زرداری اسمبلی نا رخ ءِ کننگ نا ہیت ءِ کننگ ءِ، او سمجھرہ کہ اوفتا برانزی سیاست آ الس چکار کتو۔ شاہ محمود قریشی پارے کہ مولانا فضل الرحمان نا جماعت اٹی ہم ترند زور و کشمکش خننگ انگ ءِ۔ ہر سینیٹ گچین کاری آن پد چندی پارٹیک ہارس ٹریڈنگ نا دوبہ خلکر و گچین کاری تا شفافیت آ سوج کریر۔ تدوک آ سینیٹ گچین کاری تیٹی ہراتم دا معاملہ مون آ بس تو وزیراعظم عمران خان 20 انا خڑک تحریک انصاف نا باسک آتا برخلاف ڈسپلنری ایکشن ہلک ہرا تاریخ اٹی مہالو اسہ جماعت اس ہم کتنے، مخدوم شاہ محمود قریشی پارے کہ وزیراعظم عمران خان و پاکستان تحریک انصاف شفاف گچین کاری تا خواہندار ءُ۔ ہندامسخت نا رداٹ نن سینیٹ گچین کاری تیٹی اوپن ووٹنگ نا سلاہ ءِ مون آ تخان۔ نن اوفتے باور کرفین کہ نن دا بابت کانودی جوڑ کننگ کن ہم تیار اُن۔ سوج دادے کہ انت اپوزیشن دا بابت کانود سازی کن نن تون تفنگ کن تیار ءِ؟ دا بابت نن سپریم کورٹ اتون رجوع کننگ نا ہم فیصلہ کرین داسہ سپریم کورٹ اوپن ووٹنگ نا بابت تینا سلاہ ایتک، شاہ محمود قریشی پارے کہ پاکستان تینا عمل اٹ دنیا ءِ باور کرفے کہ نن ڈیہہ ٹی امن و سوگوی نا خواہندار اُن۔ زرگزران نا سوگوی، امن و ایمنی تون گنڈوک ءِ، امن مریک تو زرکاری مریک و زرکاری مریک تو روزگار نا وارخواہی ودی مریک۔ وزیر خارجہ پارے کہ اوغان امن عمل اٹ نن امن کن خیرخواہی نا کڑد ءِ ادا کننگ اُن ہرانا دنیا ستاءِ کننگ ءِ۔ وزیراعظم عمران خان تو حکومت اٹ بننگ تون بھارت ءِ سلہ خلک کہ او امن نا کنڈآ اسہ گام اس مون آ برے نن اِراگام مون آ برینہ۔ ولے افسوز کہ بھارت دا سلاہ غا چکار کتو و ہندن ءُ گام گیج کرے ہرافتیان مقبوضہ کشمیر اٹی حالیت آک پین خراب مسر۔ مودی سرکار بھارتی بزغر آتے بھاز جھانسہ تننگ نا کوشست کرے۔ بزغر آتیکن کم از کم امدادی نہاد نا چٹفنگ و پوسکن آ کانود نا اطلاق آن بھارتی بزغر آتا استحصال نا کسرءِ آوار کننگا۔ بزغر آک دا غیر منصفانہ گام گیج آتا برخلاف ہراتم توار بڑز کریر تو اوفتے ریاستی جبر و بیدادی نا شست کننگا۔ وزیر خارجہ پارے کہ بھارتی یوم جمہوریہ غا بھارتی بزغرآک اسہ وار ولدا دہلی نا کنڈآن اسہ بھلو ریلی اس کشنگ نا پڑو ءِ کرینو۔ بھارتی سرکار غٹ کوشست آتیان پد ہم بزغرآتا توار ءِ توننگ اٹ بےسہب مس۔ اینو مچ آ ہندوستان اوفتے تون ہم توار ءِ۔ مخدوم شاہ محمود قریشی پارے کہ مقبوضہ کشمیر اسہ تسلیم مروک جہانی تنازع اسے۔ بھارت بھلو وخت اسے آن کشمیری تا بنداوی حق ءِ معطل کرینے۔ اوفتے جبر و استبداد نا شست کننگ انگ ءِ۔ نن سمجھپنہ کہ اِرا ایٹمی واکدار د ویل ءِ زور انا زی آ ایسر کننگ کیرہ۔ داوڑکننگ خودکشی آنبار مریک۔ وزیر خارجہ مخدوم شاہ محمود قریشی پارے کہ اگہ بھارت نا موقف سوگو ءِ تو او ہیت وگپ آن انت اکن خلینگ اٹی ءِ، نن دنیا ءِ پدریسہ باور کرفنگ اُن کہ کشمیر اسہ فلیش پوائنٹ اس جوڑ مسنے ہرانا زوت و آخبت ایسری المی ءِ۔
