ملتان۔24جنوری (اے پی پی): وزیر ءِ درئی کار مخدوم شاہ محمود قریشی ءَ گوشت کہ بائیڈن انتظامیہ ءُ پاکستان ءِ لیکہ اوگان ایمنی کار ءَ ھمگونگ انت۔ گران بھائی ءِ زمہ وار گوستگیں حکومت انت۔ بلاول بھٹو ءَ عمران خان ءَ را کانودی مزن وزیر تسلیم کنان ءَ مزن وزیر ءَ را سیٹ ءَ چہ ایر گیجگ ءِ جار جتگ۔ ایشی ءَ چہ سہرا بیت کہ عمران خان سلیکٹڈ نہ انت الیکٹڈ مزن وزیر انت، ایشرا سلیکٹڈ گوشگ بند کنگ بہ بیت۔ ملتان ءِ نامداریں نیک راھی سروک الحاج شفقت حسینین بھٹہ ءِ پاتیہ وانی ءَ شریکی ءَ چہ پد میڈیا ءَ گوں تران کنان ءَ وزیر ءِ درئی کار شاہ محمود قریشی ءَ گوشت کہ من نوکیں امریکی وزیر ءِ درئی کار ءَ را اوگانستان ایمنی کار ءِ ھوالگ ءَ نمدی نبشتہ کتگ۔ امریکی صدر جوبائیڈن ءَ وتی کشک ءِ گچین کتگ۔ اوگان جیڈھ ءِ ھوالگ ءَ پاکستان ءُ نوکیں امریکی انتظامیہ ءِ سسا ھمگونگ انت، ما ھم آھودا ایمنی لوٹاں۔ اوگان جیڈھ ءِ اچ اُردی گیواری نیست انت، بائیڈن انتظامیہ اوگانستان ءَ لٹ ءُ کُٹ ءِ تہ ءَ کمی آرگ لوٹاں۔ ما اوگانستان ءَ لٹ ءُ کٹ ءِ تہ ءَ کمی، ناشرکاری ءِ ھلاسی ءُ جمہوری کار ءَرا برجم گندگ لوٹاں۔ امریکی انتظامیہ ءِ ھم ھمے سسا انت۔
