اسلام آباد۔23جنوری (اے پی پی):آزاد جموں کشمیر ءِ صدر سردار مسعود خان ءَ گوشت کہ پارلیمانی سفارتکاری ءِ وسیلگ ءَ کشمیر ءِ جیڈھ ءَ را میاں اوستمانی تک ءَ جوانیں رنگ ءَ سہرا کنگ بہ کنت ءُ اے رد ءَ پاکستان ءِ استیں پارلیمان جوانیں کرد پیلو کت کنت۔ اے گپ آئی ءَ راجی اسمبلی ءِ سپیکر اسد قیصر ءَ گوں گند ءُ نند ءِ ساھت ءَ تران کنان ءَ کت۔ گند ءُ نند ءَ پارلیمان ءِ کشمیر کمیٹی ءِ چیئرمین شہریار خان آفریدی ھم ساڑی ات۔ صدر آزات کشمیر ءَ پاکستان ءِ پارلیمان ءِ نیمگ ءَ جتا جتائیں موہ آنی ھوالگ ءَ کشمیری الس آنی گوما یکوئی ءِ درشان کنگ ءُ مقبوضہ کشمیر ءِ جاور ھال آناں دگنیا ءِ جتا جتائیں پارلیمانی فورمز آنی سر ءَ سہرا کنگ ءِ پد ءَ راجی اسمبلی ءِ شگر ءُ منت واری گپت۔ آئی ءَ گوشت کہ کشمیر ءِ جیڈھ یک گیواری جیڈھ ات ایشرا یونائیٹڈ نیشن ءِ سلامتی کونسل ءَ گوستگیں ھپتاد ءُ دو سال ءَ است انت، اے جیڈھ ءِ رد ءَ گوستگیں ھپتاد سال آنی تہ ءَ بے کساس مردم بیران ءُ ٹپی ءُ ٹوری بوتگ انت، ایشرا نوں گیوار بوھگ لوٹ ایت۔
