اسلام آباد۔ 22 جنوری (اے پی پی) بنجائی وزیر منشیات تور بریگیڈیئر (ر) محمد اعجاز شاہ جمعہ نادے آ وزیراعلیٰ پنجاب سردار عثمان بزدار تون اوڑدہی کرے و تین پہ تینی است خواہی نا امور تون اوار سیاسی حالیت و منشیات نا چٹفنگ نا بابت گام گیج آتیا گپ وتران کریر۔ داڑے جاری کروک بیان اسے نا رداٹ داوخت آ منشیات نا تور انا بابت مربوط حکمت عملی نا رداٹ اسیجائی وڑاٹ گام گیج کننگ آ امنا مس۔ اوڑدہی ٹی فیصلہ کننگاکہ منشیات نا مکروہ دھندہ نا چٹفنگ کن گچین گام گیج کننگک۔ وزیراعلیٰ پنجاب عثمان بزدار داوخت آ پارے کہ منشیات نا کاروبار کروک آ زموار آتا سختی اٹ سرکوبی ءِ کننگک، پولیس، ایکسائز و تعلقدار محکمہ غاک منشیات تور فورس نا ہروڑاٹ کمک ءِ کیرہ۔ اوپارے کہ منشیات نا دھندہ کروک آک انسانیت نا قاتل ءُ، منشیات بہا کننگ نا برخلاف پنجاب اٹی بے پرخ کریک ڈاؤن برجاسلک۔ اوپارے کہ تعلیمی ادارہ غاتا پیشن منشیات نا مکروہ دھندہ کروک آتا جاگہ زندان ءِ۔ وزیراعلیٰ پنجاب پارے کہ ورناچین نا رغ تیٹی زیار شاغوک آتا برخلاف بے پرخ کارروائی مریک۔ داناسور نا چٹفنگ کن اواری اٹ پین ترندی اٹ گام گیج کینہ۔ اوپارے کہ منشیات آن پاک راج اکن غت ءِ اواری اٹ جہد کروئی ءِ۔ وزیراعلیٰ پنجاب پارے کہ گڑاس زموار مخصوص ایجنڈا نا رداٹ ادارہ غاتے شست کننگ ءُ۔ ملک ءِ کیہی چیلنج مون تروک ءِ، ادارہ غاتا برخلاف پروپیگنڈا قابل مذمت و افسوزناک ءِ۔ اوپارے کہ نن قومی ادارہ غاتون سلوک اُن و سلنہ۔ داوخت آ گپ وتران کرسا بنجائی وزیرمنشیات تور پارے کہ منشیات نا ہڷ و بہاکروک آ زموار آک رعایت نا حقدار افس۔ پنجاب حکومت تون اواری اٹ منشیات نا ہڷ وبہاکروک آ زموار آتے کانود نا گرفت اٹ اتینہ۔ اوپارے کہ منشیات نا کاروبار کروک آتا برخلاف اسیجائی کارروائی مریک۔ بنجائی وزیر پارے کہ گڑاس زموار آتا کنڈآن ادارہ غاتیا دشنام طرازی نا ہچ ءُ سوب اس اف۔ اپوزیشن نا کنڈآن ادارہ غاتے جھیڑہ ئی جوڑ کننگ نا خاص انگا ایجنڈا بے نقاب مسنے۔ اوپارے کہ اپوزیشن تینا ملک دشمن بیانیہ غان پاکستان ءِ نسخان تننگ اٹ لگوک ءِ۔
