کراچی۔ 22 جنوری (اے پی پی) بنجائی وزیر داخلہ شیخ رشید احمد پاکستان کوسٹ گارڈز (پی سی جی) نا ہیڈکوارٹر نا دورہ ءِ کرے، ڈائریکٹر جنرل (ڈی جی) پاکستان کوسٹ گارڈز بریگیڈیئر ثاقب قمر بنجائی وزیر ءِ بخیر کرے۔ ترجمان پی سی جی نا رداٹ بنجائی وزیر داخلہ یات گار شہداء آ حاضری تس و پھل شاغا۔ بنجائی وزیر داخلہ ءِ پاکستان کوسٹ گارڈ انا کسبی امور آ حوال تننگا ہراٹی کوسٹ گارڈ انا زمواری تے پورو کننگ و اسمگلنگ خاص کر منشیات تور نا توننگ کن کروک آ کوشست آتا ذکر ءِ کننگا۔ بنجائی وزیر داخلہ شیخ رشید احمد ءِ پاکستان کوسٹ گارڈ انا ہیلکاری امور و اسمگلنگ نا توننگ کن کروک آ گام گیج و ہلوک آ منشیات، شراب و ایلو جنرل آئٹم آتا سرجم آتے ہم پاننگا۔ بنجائی وزیر داخلہ ادارہ نا کسبی کارکڑد، وارتا بڑز عزم، حوصلہ و کوشست خاص کر منشیات تور انا بابت کروک آ گام گیج و کوشست آتا ستاءِ کرسا پارے کہ ڈغار و سمندر اٹی اسہ وخت اٹی تینا فرض ءِ سرتروک آ پاکستان کوسٹ گارڈ انا فورس انا نئے بیرہ زمانہ امن بلکن ہروڑنا جنگی حالیت اٹ اسہ اہم ءُ کڑداسے۔ حکومت نا کنڈآن پاکستان کوسٹ گارڈ ءِ پین فعال و سوگو کننگ کن ہروڑ کمک نا باوری ہم کرفنگا۔
