اسلام آباد۔ 22 جنوری (اے پی پی) اسپیکر قومی اسمبلی اسد قیصر تون آزاد جموں و کشمیر نا صدر سردار مسعود خان جمعہ نادے آ پارلیمنٹ ہاؤس اٹی اوڑدہی کرے ہراٹی چیئرمین کشمیر کمیٹی شہریار آفریدی ہم ساڑی ئس۔ اوڑدہی ٹی مقبوضہ کشمیر نا ساڑی آ حالیت آتون اوار تین پہ تینی است خواہی نا اہم باندات آ گپ وتران کننگا۔ اسپیکر داوخت آ پارے کہ کشمیر پاکستان نا شہ رگ ءِ و پاکستان اسُل داڑآن غافل مننگ کپک۔ پاکستانی الس و حکومت کشمیری الس و کشمیر اٹی مروک آ ظلم و بربریت نا ترندی اٹ مذمت ءِ کیرہ، اسد قیصر پارے کہ کشمیری الس نا بھارتی ظلم و بربریت نا مون آ بدل مفروک جوزہ حق خودارادیت نا دنیا ٹی درور ملیپک۔ دنیا مقبوضہ کشمیر اٹی انسانی حق انا لتاڑ و کشمیری الس نا کشت و خون نا نوٹس ہلے۔ بھارت کشمیر نا ویل آن چکار ءِ اسہ کنڈ کننگ کن چم بازی کننگ ءِ۔ کشمیر نا ویل انا ایسری آن بیدس ڈیہہ ٹی امن مننگ کپک۔ کشمیر نا ویل اقوام متحدہ نا قرارداد آتے مون آ تخسا ایسر کننگے۔ پاکستان نا پارلیمان کشمیری الس نا حق خودارادیت و جہد آجوئی نا پورو مخ تفی ءِ کیک۔ پاکستان نا پارلیمنٹ اٹ کشمیر نا ویل ءِ جہانی کہول آ تالان کننگ کن پبی گام گیج کننگانے۔ اوپارے کہ قائمہ کمیٹی انسانی حق، خارجہ امور و کشمیر کمیٹی ءِ کشمیر نا ویل ءِ جہانی کہول آ تالان کننگ نا پارت کننگانے۔ صدر آزاد کشمیر مسعود خان پارے کہ آزاد کشمیر نا الس پورو وڑاٹ مقبوضہ دامان نا الس تون تفوک ءُ۔ کشمیر نا الس نا مزل پاکستان ءِ و پاکستان ہی مریک۔ کشمیری الس مہالو ہم پاکستان تون سلوک ئسر و اینو ہم پاکستان تون سلوک ءُ۔ بھارت اقوام متحدہ نا قرارداد آتا رداٹ کشمیر نا ویل ءِ ایسر کے و ہموڑے برجا کودک کشمیری تیا ظلم و بربریت ءِ دمدستی بند کے۔ ملک انا سالمیت و بقاکن مچ آ قوم یکجاءِ وہر جارحیت نا پبی ورندی ءِ تخنگ نا لائخی تخک۔ ساڑی حکومت کشمیر اٹی بھارتی فوج انا کنڈآن انسانی حق انا خلاف ورزی تے پبی وڑاٹ جہانی کہول آ تالان کرینے۔ صدر آزاد کشمیر پارے کہ پاکستان نا کنڈآن مقبوضہ کشمیر نا الس تون یکجہتی نا درشانی و کشمیر نا ویل ءِ پرامن ایسری کن کوشست ستاکڑزک۔ مقبوضہ کشمیر نا حالیت آتیا جہانی پارلیمانک پبی وڑاٹ توار بڑز کرینو۔ صدر آزاد کشمیر پارلیمانی سفارتکاری نا کمک اٹ کشمیر ناویل ءِ علاقائی و جہانی کہول آ تالان کننگ آ اسپیکر قومی اسمبلی ءِ خراج تحسین پیش کرے۔
