اسلام آباد۔ 22 جنوری (اے پی پی) وزیراعظم عمران خان نا کماشی ٹی راوی اربن ڈویلپمنٹ ڈٹ، سینٹرل بزنس ڈسٹرکٹ ڈٹ، والٹن ایئر پورٹ نا گدریفنگ و پنجاب نا چنکا شار تا اطراف اٹ وزیراعظم عمران خان نا ویژن نا رداٹ الس ءِ اڑزآن ہنکین نا فراوانی نا ڈٹ انا بابت پیش رفت آ جاچ دیوان اس اڈ ہلک۔ جمعہ نادے آ وزیراعظم آفس نا میڈیا ونگ آن جاری بیان نا رداٹ دیوان اٹی خصوصی کمکار ڈاکٹر شہباز گل، چیئرمین نیا پاکستان ہاؤسنگ اتھارٹی لیفٹیننٹ جنرل (ر) انور علی حیدر و سینئر آفیسر آک ساڑی ئسر۔ صوبائی وزیر خزانہ پنجاب مخدوم ہاشم جواں بخت، سلاہکار وزیراعلیٰ پنجاب ڈاکٹر سلمان شاہ، خصوصی کمکار وزیراعلیٰ پنجاب ڈاکٹر فردوس عاشق اعوان، چیئرمین راوی اربن ڈویلپمنٹ اتھارٹی راشد عزیز و سینئر آفیسر آک دیوان اٹی ویڈیو لنک انا کمک اٹ بشخ ہلکر۔ دیوان ءِ معلومدار کننگاکہ راوی سٹی نا ڈٹ اٹی کنسلٹنٹ تون مذاکرات و ڈیزین نا بابت باندات گڈیکو ریسہ غاتیٹی پترینگانے۔ دیوان ءِ ویسٹ واٹر پلانٹ نا بابت پیش رفت آ حوال تننگا و معلومدار کننگاکہ زرکار آتا کانفرنس نا زوت اڈتننگ نا بابت گام گیج کننگ انگ ءِ۔ بشخ ہلوک آتے ڈٹ اٹی ڈغار نا دوئی کننگ اٹ مروک آ پیش رفت آ ہم معلومدار کننگا۔ سینٹرل بزنس ڈسٹرکٹ ڈٹ و والٹن ایئر پورٹ نا گدریفنگ نا بابت بشخ ہلوک آتے معلومدار کننگاکہ دا ڈٹ انا کمرشل، ریٹیل و ہنکینی زوننگ جہانی آب بڑزکو آب انا رداٹ کننگ انگ ءِ۔ تعمیرات نا بابت اسہ پوسکن ءُ تصور اسے نا رداٹ داڈٹ ءِ پورو کننگک۔ وزیراعظم عمران خان ڈٹ انا فائدہ غاتا بابت ذکر کرسا پارے کہ لاہور نا الس کن دا ڈٹ راجی و زرگزرانی لحاظ اٹ بھاز اہم ءِ۔ ڈٹ انا پوروی آن بھلو وخت اسے آن کاریم اٹ اتنگپروک ڈغار آ آب اٹ تعمیرات آن نئے بیرہ زرگزرانی سرجزآتیٹی ودکی مریک بلکن روزگار نا وارخواہی ہم رسینگک۔ دیوان ءِ صوبہ پنجاب نا چنکا شار تا اطراف اٹ وزیراعظم نا ویژن نا رداٹ کم کٹیا کروک تپہ ءِ کم خڑچ انا اُراتا تفنگ نا سلاہ ئی ڈٹ آتا بابت حوال تننگا۔ کم خڑچی 3 آن 5 مرلہ اُراتا دا ڈٹ بناٹی صوبہ نا 25 آن 27 ضلع غاتا اطراف اٹ مریک و اوکان پد اونا دنگ ءِ 87 لوکیشن آتسکان پدریسہ ودفنگک۔ دیوان ءِ حوال اٹی پاننگاکہ حکومت پنجاب ڈغار فراوان کننگ تون اوار اوار بنائی ریسلہ ٹی سرمایہ فراوان کیک و بروک آ ریسہ ٹی مارٹیگج فنانسنگ نا رداٹ سبسڈی فراوان کننگک۔ وزیراعظم عمران خان نیزگار و کم کٹیا کروک تپہ کن داڈٹ انا فائدہ غاتا رداٹ ٹائم لائنز متعین کننگ و زوت بناءِ کننگ نا پارت کرے۔
