اسلام آباد۔ 21 جنوری (اے پی پی) جہانی بینک پاکستان نا زرگزرانی و راجی شونداری ہدف آتا دوئی کننگ کن اولیت آتا تعین و مالی کمک نا فراوانی ٹی جہانی بینک انا کڑد انا بابت خصوصی سروے نا بناءِ کرینے۔ پاکستان اٹی جہانی بینک انا کنٹری ڈائریکٹر ناجی بن حسائن راجی رابطہ نا ویب سائٹ آ اسہ کلہو اسے ٹی پارینے کہ پاکستان نا زرگزرانی و راجی شونداری ہدف آتا دوئی کننگ کن اولیت آتا تعین و مالی کمک نا فراوانی ٹی جہانی بینک انا کڑد انا بابت خصوصی سروے ٹی پاکستانی شاریک بشخ ہلیر۔ دا سروے جہانی بینک انا کنڈآن پاکستان کن پوسکن آ کنٹری شریداری فریم ورک (سی پی ایف) نا تیاری تا بشخ اسے۔ جہانی بینک 2022آن ہلیس 2026 اسکان نا مد اکن پاکستان تون پوسکن آ شریداری فریم ورک اس ٹہیفنگ نا رداٹ سلابتی عمل نابناءِ کرینے۔ فریم ورک اٹی پاکستان کن اسٹریٹجک کمکاری نا خدوخال پیدوار مریک۔ جہانی بینک ہر 4 آن ہلیس پنچ سال آن پد باسک ملک آتیکن پوسکن آ کنٹری پارٹنر شپ فریم ورک اس تیار کیک ہراٹی ہر باسک ملک انا بدل مروک اولیت آتے اوار کننگک۔ ناجی بن حسائن پارے کہ پوسکن آ فریم ورک اٹی جہانی بینک انا کمکاری ءِ پاکستان نا شونداری ایجنڈاتون مربوط کننگک۔ اوپارے کہ پوسکن آ فریم ورک انا ٹہیفنگ اٹ کلیدی شریدار، حکومتی کمامدار، پارلیمنٹرینز، نجی بشخ، سول سوسائٹی نا تنظیم بشمول زالبول وورناتا پڑک، جہانی مالیاتی ادارہ، سفارتی کمیونٹی ، میڈیا و تعلیم نا چاہندار آتون سلابت کننگ انگءِ۔ دا سلابت نا مسخت پاکستان نا اقتصادی و راجی چیلنج آتا کلیدی شریدار آتا متنوع سلاہ و خیال آتیان آگاہی دوئی کننگ و اوفتے مون آ تخسا کمکاری عمل ءِ مون آ دننگءِ۔
