اسلام آباد۔ 21 جنوری (اے پی پی) چیئرمین سینیٹ محمد صادق سنجرانی پارینے کہ بلوچستان صوبہ قدرتی وسیلہ غاتیان شُپ ءِ، معدنیات نا بابت تعلیم و کسب نا مون آ دننگ اٹ عمرخان سنجرانی یونیورسٹی اہم ءُ مزل نا نشان اس مریک، پاکستان اٹی فنی تعلیم آن آراستہ کسبکار بندغ آتا سخت گرج ءِ، دادور سپیشلائزیشن نا دور ءِ۔ داخیال آتا درشانی ءِ او ہائیر ایجوکیشن کمیشن ناکمامدارآتون گپ وتران کرسا کرے ہرا پنچ شنبے نادے آ داڑے اوڑتون اوڑدہی کریر۔ اوڑدہی ٹی چیئرمین سینیٹ ءِ نوکنڈی، چاغی ٹی عمرخان سنجرانی معدنیات و قدرتی وسیلہ یونیورسٹی تا جوڑ کننگ نا بابت پیش رفت آن معلومدار کننگا۔ ایچ ای سی کمامدارآک چیئرمین سینیٹ ءِ حوال ترسا پاریر کہ یونیورسٹی نا جوڑ کننگ نا بنائی کساس نا منظوری ایچ ای سی تسنے۔ ایچ ای سی نا کنڈآن اولیکو سال اکن یونیورسٹی نا تفنگ کن خلوک آ کساس خڑچ انا اولیکو سال اکن 3 ارب روپئی نا اصولی منظوری ءِ تننگانے۔ خصوصی ٹیمک زوت نوکنڈی و کوئٹہ نا دورہ ءِ کیرہ۔ ایچ ای سی کمامدارآک پاریر کہ خصوصی ٹیمک غٹ اسٹیک ہولڈر آتا سلاہ ءِ ہلنگ کن ہڑتوم آ ہند آتا دورہ ءِ کیرہ۔ فروری نا ارٹ میکو ہفتہ ٹی ڈٹ انا فزیبلیٹی رپورٹ ءِ پیش کننگک۔ یونیورسٹی نا جوڑ کننگ کن کنسلٹنٹ نا خذمت ءِ مہالو آن دوئی کننگانے۔پی سی (II) ہم سی ڈی ڈبلیو پی آن مہالو آن منظور مسنے۔ داوخت آ چیئرمین سینیٹ پارے کہ بلوچستان صوبہ قدرتی وسیلہ غاتیان شُپ ءِ۔ معدنیات نا بابت تعلیم و کسب نا مون آ دننگ اٹ عمرخان سنجرانی یونیورسٹی اہم ءُ مزل نا نشان اس مریک۔ ڈٹ انا آب ءِ پک کننگ و وخت آ پوروی کن گچین لائحہ عمل اس شین تننگے۔ اوپارے کہ داتینا وڑنا یکتا ءُ یونیورسٹی اس مریک۔ پاکستان اٹی فنی تعلیم آن آراستہ کسبکار بندغ آتا سخت گرجءِ۔ داوڑنا تعلیمی ادارہ معدنیات نا مون آ دننگ کن درکار افرادی قوت ہندی کہول آ فراوان کیک۔ محمد صادق سنجرانی پارے کہ ٹ ادارہ غاک اسہ ایلو تون کمک و رابطہ کاری ءِ جوان کیر تانکہ ڈٹ آ کاریم ءِ ترند کننگے۔ نیزگاری نا چٹفنگ، شونداری نا عمل ءِ ترند کننگ اٹ فنی تعلیم نا بڑزکو ادارہ غاک کلیدی کڑد ادا کیرہ۔ یونیورسٹی نا تعلقدار صنعت اتون رابطہ المی ءِ۔ دا دور سپیشلائزیشن نا دور ءِ۔ کسب و فنی تعلیم کن پوسکن آ وڑوڈول آتیا تعلیمی ادارہ جوڑ کروئی مریک۔
