اسلام آباد۔ 21 جنوری (اے پی پی) صدر مملکت ڈاکٹر عارف علوی پارینے کہ معذوری سرٹیفکیٹ نا آسان و دمدستی دستیابی کن ملک اٹی ون ونڈو آپریشن درستی راستی کرفنگ نا گرج ءِ۔ تعلقدار اسٹیک ہولڈرز خصوصی بندغ آتا آسانی کن اسلام آباد اٹی طبی چاہندار و نادرا نا نمائندہ غاتیا تالان اسہ ادارہ جاتی نظام اس جوڑ کیر۔ داخیال آتا درشانی ءِ او پنچ شنبے نادے آ خصوصی بندغ آتا رجسٹریشن نا بابت دیوان نا کماشی ءِ کرے۔ دیوان اٹی وزیراعظم نا خصوصی کمکار جان جوڑی ڈاکٹر فیصل سلطان، وزیراعظم نا خصوصی کمکار تخفیف نیزگاری ڈاکٹر ثانیہ نشتر، چیئرمین نادرا عثمان یوسف مبین و وزارت جان جوڑی نا کمامدارآک ساڑی ئسر۔ داوخت آ گپ وتران کرسا صدر ڈاکٹر عارف علوی پارے کہ معذوری سرٹیفکیٹ نا آسان و دمدستی دستیابی کن ملک اٹی ون ونڈو آپریشن درستی راستی کرفنگ نا گرج ءِ۔ سرٹیفکیٹ و رجسٹریشن نا ساڑی آ عمل سست و مشکل ءِ، اودے آسان جوڑ کننگ نا گرج ءِ۔ اوپارے کہ معذوری ملکی آبادی نا کم و ود 12 آن 14 درسد بشخ ءِ۔ تعلقدار اسٹیک ہولڈر آک خصوصی بندغ آتا آسانی کن اسلام آباد اٹی طبی چاہندار و نادرا نا نمائندہ غاتیا تالان اسہ ادارہ جاتی نظام اس جوڑ کیر۔ معذوری نا ستاء آ امنائی سلاہ ودی کننگ و معذوری ءِ پک کننگ کن صوبہ غاتون سلابت کننگے۔ داوخت آ صدر مملکت ءِ حوال اٹی پاننگاکہ داتم اسکان نادرا تون 339،000آن زیات خصوصی بندغ رجسٹرڈ مسنو، احساس پروگرام نا رداٹ خصوصی بندغ آتا بابت سروے جون 2021نا ایسراسکان پورو کننگک۔
