پشاور۔20جنوری (اے پی پی): مزن وزیر عمران خان ءَ گوشت کہ فارن فنڈنگ کیس ءَ را تل پچیں رنگ ءَ گوشداری بہ بیت، ءُ ایشرا ٹی وی چینل آنی سر ءَ لائیو پیش دارگ بہ بیت، پارٹی سروک آناں ھم نندارینگ ءُ گوشدارگی انت، بازیں ملک اپوزیشن گل آنی فنڈنگ کتگ بلے سیادی ءُ دوستی ءِ سبب ءَ آ ملک آنی نام ءَ نہ گراں۔ چار شمبے ءَ زربارئی وزیرستان وانا ءَ اھوالکاراں گوں تران کنان ءَ آءی ءَ گوشت کہ فارن فنڈنگ کیس سہرا کنگ ءِ پد ءَ اپوزیشن ءِ شگر ءُ منت وار آں، اے درستیں کار آناں دیم ءَ سہرا بوھگی انت، تحریک انصاف ءُ اپوزیشن گل آنی فنڈنگ کجا چہ بوتگ انت، بازیں ملک آں اپوزیشن گل آناں زر داتگ۔ اے ملک آں گوں سیادی ءِ سبب ءَ ایشانی نام ءَ گوشت نہ کناں، اے کیس ءَ چہ سرجمیں راج ءَ را سما کپ ایت کہ کئے ءَ زر چتگ ءُ یکجا کتگ۔ آئی ءَ گوشت کہ ڈن ملک ءَ نندوکیں پاکستانی آنی روان داتگیں زر آں چہ ملک چل ایت، آئی ءَ گوشت کہ من شوکت خانم ہسپتال ءِ فنڈنگ زر ءَ آدیم نندوکیں پاکستانی آنی کمک ءَ چہ کتگ، آئی ءَ گوشت کہ من چیلنج کنان کہ سیاسی فنڈ ریزنگ ایوک ءَ تحریک انصاف ءَ کتگ۔ اپوزیشن ءِ گل زان انت کہ من ھم سر پد آں کہ فارن فنڈنگ کجام انت، اوورسیز پاکستانی آنی زر فنڈنگ نہ انت۔ مولانا فضل الرحمان ءِ سر ءَ ایراد گران ءَ آئی ءَ گوشت کہ مولانا فضل الرحمن مدرسہ ءِ زھگ آناں کارمرد کنان ءَ حکومت آناں بلیک میل کنت، آئی ءِ اربانی کلدار آنی جائیداد کجا چہ اتکگ انت۔ آ این آر او ءِ واستہ بلیک میل کنگ ءَ انت، الس شاھوکار انت ، آ کسے دزئی ءُ ڈنگی ءِ بچارینگ ءِ واستہ ھمبراھی ءَ ڈن ءَ در مکپ انت۔ آئی ءَ گوشت کہ 18 ھژدھمی مٹ ءُ بدلی ءَ چہ پد ما صوبگ آنا وتی ھمگامی ءَ ابید اچ کت نہ کناں، معاشی بدحالی ءُ کورونا ءَ ابید مئے معاشی ٹک ایندگر ملک آں چہ گہتر انت، کورونا ءَ ابید مئے برآمدی چیز آنی تہ ءَ گیشی بوتگ، فیصل آباد ءُ سیالکوٹ ءَ مزوری ءِ واستہ مردم دست نہ کپگ ءَ انت۔
