اسلام آباد۔ 20 جنوری (اے پی پی) حکومت کزیت کروک آ ہر پاکستانی شاری نا وارث آتے جائیداد آتا کانودی وڑاٹ گدریفنگ کن آسان نظام اس جوڑ کرینے، ہرانا رداٹ متوفی نا کانودی وارث آتے جائیداد نا گدریفنگ نا عمل سال آتا جاگہ غا داسہ دے تیٹی پورو مننگ کیک۔ پوسکن آ نظام نابناءِ کننگ نا بابت بنائی دود اینو(پنچ شنبے) نا دےآ وزیراعظم ہاؤس اسلام آباد اٹی مریک ہراٹی وزیراعظم عمران خان پوسکن آ نظام نا باضابطہ بناءِ کیک۔ چارشنبے نادے آ وزارت کانود و انصاف نا ترجمان نا کنڈآن جاری بیان اٹی پاننگانے کہ وزارت عظمیٰ نا منصب ءِ سنبھالنگ تون وزیراعظم عمران خان بنجائی وزیر کانود ءِ کزیت کروک آ بندغ آتا جائیداد نا گدریفنگ نا بابت آئینی اصلاحات درستی راستی کرفنگ نا زمواری ءِ تسوسس۔ داکاریم ہم بھاز اہمیت نا حامل ئس۔ بنجائی وزیر کانود و انصاف ڈاکٹر محمد فروغ نسیم لس بندغ نا فائدہ غاتے مون آ تخسا بل آتا مسودہ غاتیا است جمی اٹ کاریم نا بناءِ کرے ہرانا مسخت الس دوست کانود سازی نا کمک اٹ اوفتے انصاف نا وخت آ فراوانی ءِ پک کننگ ئس۔ بنجائی وزیر ءِ کانود نا مسودہ تیار کننگ کن 100 دے انا مہلت تننگا ولے او سخت خواری نا کمک اٹ آئینی مسودہ ءِ 75 دے انا تہٹی پورو کرے۔ وزارت کانود وانصاف نا ترجمان نا رداٹ کانودسازی نا غٹ آن اہم پہلو’’لیٹرز آف ایڈمنسٹریشن اینڈ سیکسیشن سرٹیفکیٹ ایکٹ 2020‘‘ ئس ہرادے پارلیمان نا منظوری آن پد فروری 2020ء ٹی نافذ کننگا۔ داایکٹ اٹ کزیت کروک آ شاری تا منقولہ و غیر منقولہ جائیداد نا کانودی وارث آتے گدریفنگ کون آ پیچیدہ ویل ءِ آسان کننگ اہم ءُ ویل اس ئس۔ ترجمان نا پاننگ ءِ کہ وزارت کانود و انصاف متوفی نا کانودی وارث آتا کنڈآن تروک آ درخواست آن پد اوفتے 15 دے انا تہٹی ’’لیٹر آف ایڈمنسٹریشن اینڈ سیکسیشن سرٹیکفیٹس‘‘(جانشینی سرٹیفکیٹ) جاری کیک۔ جاری کنننگ کن نیشنل ڈیٹا بیس اینڈ رجسٹریشن اتھارٹی(نادرا) نا شریداری اٹ ’’سہولت یونٹ‘‘ اس جوڑ کننگ نا وڑوڈول اس وضع کرینے۔ نادرا ملکی تاریخ اٹی اولیکو وار بائیو میٹرک پک انا کمک اٹ ’’سکسیشن سرٹیفکیٹس ‘‘ و ’’لیٹرز آف ایڈمنسٹریشن‘‘ جاری کیک۔ نادرا نا کمک اٹ دستاویز آتا پک کننگ آن جائیداد نا منتقلی ٹی ہروڑنا دروہ، یا فراڈ نا گمان پورو وڑاٹ چٹک۔ ترجمان پارے کہ مستین اٹ شاری تے داوڑنا دستاویز آتا دوئی کننگ کن کم آن کم اِرا و زیات آن زیات ہفت سال اسکان عدالت آتا چکر ءِ خلوئی تماکہ ولے تحریک انصاف نا حکومت دا تاریخی گام اٹ شاری تے دستاویز آتا دوئی کننگ اٹ بیرہ 15 دے لگک۔
