اسلام آباد۔ 20 جنوری (اے پی پی) وزیر خارجہ مخدوم شاہ محمود قریشی پارینے کہ پاکستان امریکہ نا پوسکن آ انتظامیہ تون انگیج کننگ نا خواہندار ءِ، جوبائیڈن، سویلی ایشیائی ڈیہہ و پاکستان نا بابت پیدوار رائے تخک، سی پیک نا رداٹ جوڑ خصوصی اقتصادی زون تیٹی امریکی زرکار آتے بخیراٹ پانہ۔ پوسکن آ امریکی انتظامیہ و پاک امریکہ تعلقداری تا بابت چارشنبے نادے آ تینا اسہ اہم ءُ بیان اسے ٹی وزیر خارجہ پارے کہ امریکہ ٹی اینو اسہ پوسکن ءُ انتظامیہ اس زمواری تے سنبھالنگ ءِ، پاکستان دا پوسکن آ انتظامیہ تون اوار انگیج کننگ نا خواہندار ءِ و اوفک ہم پاکستان تون اواری اٹ کاریم کننگ نا خواہندار ءُ۔ پوسکن آ امریکی انتظامیہ ٹی ہرا شخصیت آک اہم عہدہ غاتیکن پندار مننگ ءُ اوفتے ٹی بھاز انگا شخصیت آک داکان مست اوباما انتظامیہ نا بشخ مسنو اوفتے تون اواری اٹ کاریم کننگ نا موقع رسینگا او ڈیہہ تون بھلو واقفیت اس تخرہ۔ شاہ محمود قریشی پارے کہ پوسکن گچین مروک آ صدر جوبائیڈن، فارن ریلیشنز کمیٹی نا بھاز متحرک و فعال رکن ئس ہراتم او پاکستان آ بس تو ای اودے بخیر کریٹ۔ جوبائیڈن، سویلی ایشیائی ڈیہہ و پاکستان نا بابت پیدوار رائے تخک۔ اوغانستان نا بابت ننا نکتہ نظر اٹ مطابقت ءِ، اولیت آتا بابت ہُننگے تو، کورونا دین نا جہانی دین نا چیلنج مون تروک مرے یا ماحولیاتی بدلی نا زہم تتون مون تننگ نا حکمت عملی مرے، پاکستان و امریکہ نا نکتہ نظر اٹ مماثلت خننگک۔ وزیر خارجہ پارے کہ بھارت نا بابت امریکہ نا کنڈآن اِرا جہتی رائے ضرور ساڑی مسنے ولے ستاکڑزوک ہیت دادے کہ دا پوسکن آ امریکی انتظامیہ نا انسانی حق انا رکھ انا بابت پیدوار موقف ءِ۔ مقبوضہ جموں و کشمیر اٹی انسانی حق انا بابت حالیت آک بھاز تشویشناک ءُ۔ دا حالیت آتا پیدواری ءِ دنیا کننگ ءِ۔ بھارت نا غیر کانودی کوزہ گیری ٹی کشمیر نا بابت ہراوڑ یورپی و برطانوی پارلیمنٹ اٹی توار بڑز کننگا انشاء اللہ زوت امریکی پارلیمنٹ اٹی ہم دانا بازگشت خف آ تمک۔ وزیر خارجہ پارے کہ اومیت ءِ کہ پوسکن آ انتظامیہ 80 لکھ کودک مظلوم کشمیری تے بھارتی استبداد و بے سوب گھیڑ آن خلاصی ترفنگ اٹ کمکار مریک۔ پاکستان ءِاونا جغرافیائی خدوخال و جغرافیائی زرگزرانی حیثیت نا سوب گوجالنگ مفک۔ آبادی نا لحاظ اٹ، ورناتا تناسب نا بابت و زرگزرانی گمان تا بابت پاکستان تون ہڑتوم آ کنڈآتا کمکاری ءِ مون آ دننگ نا بھلو وارخواہی اس ساڑی ءِ۔ پاک چین اقتصادی راہداری نا رداٹ جوڑ مروک آ خصوصی اقتصادی زون تیٹی اگہ امریکی زرکار، زرکاری کننگ خوارہ تو اوفتے بخیر اٹ پانہ۔
