اسلام آباد۔ 20 جنوری (اے پی پی) بنجائی وزیر داخلہ شیخ رشید احمد پارینے کہ پاکستان وزارت داخلہ ٹی بارڈر مینجمنٹ ونگ اس جوڑ کرینے، پاکستان یکم مئی آن ای پاسپورٹ نا بناءِ کننگ ءِ، انسانی اسمگلنگ و مصںوعات آتا غیر کانودی ہڷ وتس ءِ توننگ نا بابت جامع گام گیج کننگ ءِ۔ داخیال آتا درشانی ءِ اوآسٹریلیا نا پاکستان اٹی ہائی کمشنر جیفری شاؤ تون گپ وتران کرسا کرے ہرا چارشنبے نادے آ داڑے اوڑتون اوڑدہی کرے۔ اوڑدہی ٹی پاکستان۔آسٹریلیا ہڑتوم آ کنڈآتا تعلقداری و تین پہ تینی است خواہی آن بیدس بارڈر مینجمنٹ ءِ گچین کننگ و کانود نافذ کروک آ ادارہ غاتا کسبی لائخی تے ودفنگ آ گپ وتران کننگا۔ داوخت آ وزارت داخلہ و آسٹریلوی ہائی کمیشن نا بڑزکو آفیسر آک ہم ساڑی ئسر۔ اوڑدہی ٹی وزیر داخلہ شیخ رشید احمد پارے کہ پاکستان وزارت داخلہ ٹی بارڈر مینجمنٹ ونگ اس جوڑ کرینے۔ انسانی سمگلنگ و مصنوعات آتا غیر کانودی ہِن و برءِ توننگ نا بابت جامع گام گیج کننگ ءِ۔ اوپارے کہ پاکستان یکم مئی آن ای پاسپورٹ نا بناءِ کننگ ءِ۔ ای پاسپورٹ آن انسانی سمگلنگ ءِ توننگ اٹ بھاز کمک رسینگک۔ ای ویزا نا بناءِ یکم جنوری آن کرینن۔ 191 ملک آتا شاری تے آن لائن ویزا تننگ اُن وخت اس کہ دا چرجوئی ٹی اوغانستان غٹ آن زیات درخواست ملنگ ءِ۔ داوخت آ آسٹریلین ہائی کمشنر پارے کہ پاکستان و آسٹریلیا نا نیام اٹ جہانی ڈوہ تا توننگ کن کمکاری ءِ ودفنگ نا گرج ءِ۔ پاکستان ءِ بارڈر مینجمنٹ ءِ گچین کننگ کن تکنیکی کمک فراوان کینہ۔ اوپارے کہ پاکستان کورونا دین انا تالانی ءِ ہراوڑ کنٹرول کرینے بھاز سفت نا قابل ءِ۔ آسٹریلین ہائی کمشنر شیخ رشید احمد ءِ وزات داخلہ نا قلمدان سنبھالنگ آ مبارکبادی تس۔
