اسلام آباد۔ 20 جنوری (اے پی پی) چیئرمین کشمیر کمیٹی شہریار خان آفریدی پارینے کہ ترکی و پاکستان نا تعلقداری اِرا جون اسہ جان آنبار ءِ، امت نا ورناتیا دیکی سوچ ءِ کم کننگ کن ترکی میڈیا نا خذمت آک بے مٹ ءُ، ترکی و پاکستان اواری اٹ امت کن جنگ ایترہ، بروک آ وخت اٹی دنیا پاک ترک سنگتی نا درور ءِ ایتک، کشمیر کمیٹی نا مسخت دودوربیدہ ئی کہول آ فن و دودوربیدہ نا کمک اٹ تینا ورناتے قدر و اخلاقیات آن معلومدار کننگ و کشمیری تا جہد نا مخ تفی ءِ کننگ ءِ۔داخیال آتا درشانی ءِ او چارشنبے نادے آ ترکی اردو نا ویب سائٹ نا پاکستتان اٹی لانچنگ نا دود و پاکستان و ترکی نا تعلقداری ٹی میڈیا نا کڑد آ سیمینار آن تران کرسا کرے۔ داوخت آ پاکستان اٹی ترکی نا سفیر احسان مصطفیٰ یرداکل ہم دود اٹی ساڑی ئسک۔ شہریار آفریدی پارے کہ ترکی و پاکستان نا تعلقداری اِرا جون اسہ جان آنبار ءُ، امت نا ورناتیا دیکی سوچ ءِ کم کننگ کن ترکی میڈیا نا خذمت آک بے مٹ ءُ۔ ترکی میڈیا مسلمان امت نا ہیروتیٹی اسہ پوسکن ءُ ساہ اس شاغانو۔ شہریار آفریدی پارے کہ دیکی تینا فائدہ غاتا مون آ دننگ کن غٹ دنگ آتے پار کرینے۔ داسہ ننا وخت ءِ، پاکستان و ترکی ءِ اسہ جاگہ غا نظریہ نا مون آ دننگ کن کاریم کروئی مریک، کشمیر کمیٹی نا مسخت دودوربیدہ نا کمک اٹ ہم کشمیر نا ویل ءِ تالان کننگ نا ءِ۔ شہریار آفریدی پارے کہ ننے تینا میڈیا نا کمک اٹ دنیا ءِ ضمیر نا بندی و نیم جنوزان تا کسہ ءِ بنفوئی ءِ۔ شہریار آفریدی پارے کہ ترکی پاکستان اواری اٹ امت کن جنگ ایترہ۔ بروک آ وخت اٹی دنیا پاک۔ ترک سنگتی نا درور ایتک۔ پاکستان ترکی نا سفیر احسان مصطفیٰ یرداگل داوخت آ تران کرسا پارے کہ او پاکستان اٹی ترکی وخت اس کہ ترکی ٹی پاکستان نا سفیر ءِ۔ پاکستان وترکی نا مخلوق اسہ ایلو تون ہنداوڑ تفوک ءُ کہ وفتے ترجمان نا ضرورت ہم پیش بفک۔ پاکستان نا شاعر ترکی ٹی پنی ءُ۔ اوپارے کہ ای پاکستان تون کاروباری، زرگزرانی و زرکارانہ تعلقداری تیٹی ودکی کن کڑد ادا کننگ اُٹ۔ پاکستان اٹ اگہ چاگڑد زرکار دوست مریک تو زیات آن زیات زرکار ترکی آن برسا داڑے زرکاری کیرہ۔ سینیٹر طلحہ محمود پارے کہ پاکستان و ترکی نا دیرینہ تعلقداری قابل قدر ءِ۔ میڈیا نا کمک اٹ اوفتے پین سوگو کننگ مریک۔ داوخت آ جنرل نعیم لودھی، سید مصطفیٰ حسین، سلمان جاوید، فاروق عادل و عبداللہ گل ئسک ہم تران کریر۔
