اسلام آباد۔ 20 جنوری (اے پی پی) وزیر خارجہ مخدوم شاہ محمود قریشی پارینے کہ پاکستان یورپی ملک آتون چندی بشخ آتیٹی ہڑتوم آ کنڈآتا اقتصادی کمکاری ءِ مون آ دننگ کن کوشست کننگ ءِ۔ کورونا نا دین انا حالیت آتیان پد ہم ننا برآمد آتیٹی ودکی مس و زرگزرانی ٹک آک گچینی نا خوشخبری تننگ ءُ، بھارت، تینا ریاستی دہشت گردی نا کمک اٹ مچ آ ڈیہہ نا امن ءِ شیف و بڑز کننگ خواہک، داہیت آتے او چارشنبے نادے آ یورپی یونین نا سفیر آتا اعزاز اٹی وزارت خارجہ ٹی دے انا ارغ نا وخت آپارے۔ وزیر خارجہ نا سلہ غا 18 سفیر وزارت خارجہ ٹی ظہرانہ ٹی بشخ ہلکر۔ وزیر خارجہ بطور سفیر پوسکن آ زمواری تے سنبھالوک آ سفیر آتے مبارکبادی تس۔ کورونا جہانی دینی چیلنج نا زرگزرانی زہم تتون مون تننگ و پدتموک ملک آتا زرگزرانی بحالی کن وزیراعظم عمران خان وام تیٹی آسراتی نا سلاہ تس ہرانا جہانی کہول آ ستا ءِ کننگا۔ وزیر خارجہ پارے کہ کچ اٹنگا وسیلہ غاتیان پد ہم کورونا دینی چیلنج تون مون تننگ کن نن ’’سمارٹ لاک ڈاؤن‘‘ نا حکمت عملی آ عمل کرین ہراڑآن دا دین انا مون ءِ توننگ اٹ خاص کمک رسینگا، کنے دا پارسا خوشی محسوس مننگ ءِ کہ ننا زرگزرانی سرجزآک پورو وڑاٹ بحال مسنو۔ دینی حالیت آتیان پد ہم ننا برآمد آتیٹی خاطر خواہ ودکی مسنے و ننا زرگزرانی ٹک آک گچینی نا خوشخبری تننگ ءُ وخت اس کہ اسٹیٹ بینک و ننا اقتصادی ادارہ غاک گچین کارکڑد نا درشانی ءِ کریر۔ وزیر خارجہ پارے کہ پاکستان و یورپی یونین نا نیام اٹ، کثیر الجہتی بشخ آتیٹی کمکاری ءِ مون آ دننگ نا بابت جون 2019اٹی اسٹریٹجک انگیجمنٹ پلان آ دستخط مس کورونا دین انا دے تیٹی کنا بھاز انگا یورپی ملک آتا ہم منصب آتون ٹیل فون رابطہ مس۔ جی ایس پی پلس اسٹیٹس نا بابت یورپی یونین نا کمکاری نا منت وار اُٹ۔ مخدوم شاہ محمود قریشی پارے کہ نن یورپی ملک آتون چندی بشخ آتیٹی ہڑتوم آ کنڈآتا اقتصادی کمکاری ءِ مون آ دننگ کن کوشست کننگ اُن۔ پاکستان اوغانستان اٹی دیرپا امن و سوگوی نا خواہندار ءِ۔ پاکستان اوغان امن عمل اٹ خیرخواہی نا کڑد، ءِ خلوص نیت اٹ ادا کرے و کرسا کیک۔
