اسلام آباد۔ 20 جنوری (اے پی پی) وزیر خارجہ مخدوم شاہ محمود قریشی تون پاکستان اٹی تعینات متحدہ عرب امارات نا سفیر حمد عبید الزعابی چارشنبے نادے آ وزارت خارجہ ٹی اوڑدہی کرے۔ اوڑدہی ٹی ہڑتوم آ کنڈآتا تعلقداری، چندی بشخ آتیٹی ہڑتوم آ کنڈآتا کمکاری تون اوار تین پہ تینی است خواہی نا باندات آ گپ وتران کننگا۔ وزیر خارجہ پارے کہ پاکستان و متحدہ عرب امارات نا نیام اٹ دیرینہ برادرانہ تعلقداری ءِ۔ دا ہڑتوم آکنڈآتا تعلقداری تا بنداو اسہ وڑ مذہبی، دودوربیدہ ئی قدر و السی کہول آ رابطہ غاتیٹی ءِ۔ مخدوم شاہ محمود قریشی پارے کہ متحدہ عرب امارات نا سرکڑدہ غاک مدام مشکل وخت اٹی پاکستان تون تفینو۔ 16 لکھ انا خڑک پاکستانی متحدہ عرب امارات اٹی رہینگ انگ ءُ۔ وزیر خارجہ جان جوڑی، تعلیم، توانائی و انفراسٹرکچر ڈویلپمنٹ نا بشخ آتیٹی متحدہ عرب امارات نا کمکاری نا ستاءِ کرے۔ وزیر خارجہ دسمبر 2020اٹی کروک آ تینا دورہ ء متحدہ عرب امارات و یو اے ای سرکڑدہ غاتون مروک آ اوڑدہی تا حوالہ ءِ ترسا پارے کہ بڑزکو کہولی ہڑتوم آ کنڈآتا وزٹس آتون ہڑتوم آ کنڈآتا تعلقداری تے پین سوگو کننگ اٹ کمک رسینگک،۔ وزیر خارجہ 2021اٹی دبئی ٹی اڈ ہلوک آ ’’ایکسپو‘‘ ٹی 3500 مربع میٹر آ تالان ’’پاکستانی پویلین‘‘ نا بابت کمک فراوان کننگ آ متحدہ عرب امارات نا سرکڑدہ غاتا منت واری ءِ ہرفے۔ اماراتی سفیر وزیر خارجہ نا منت واری ءِ ہرفسا، پاکستان و متحدہ عرب امارات نا نیام اٹ ہڑتوم آ کنڈآتا تعلقداری تا مون آ دننگ کن تینا پبی کوشست آتے کاریم اٹ اتنگ نا عندیہ تس۔
