اسلام آباد۔ 19 جنوری (اے پی پی) صدر مملکت ڈاکٹر عارف علوی بروک آ گچین کاری تے ساف و شفاف وڑاٹ کرفنگ نا گرج آ زور شاغسا پارینے کہ داڑآن پاکستان اٹی سرسہب جمہوری نظام ءِ مون آ دننگ دوئی مریک۔ داخیال آتا درشانی ءِ او سے شنبے نادے آ گورنر سندھ، عمران اسماعیل و چیف آرگنائزر، پاکستان تحریک انصاف سیف اللہ خانی نیازی تون اوڑدہی ٹی کرے۔ ایوان صدر نا پریس ونگ آن جاری بیان نا رداٹ اوڑدہی ٹی ملک انا جم سیاسی حالیت و بروک آ گچین کاری تیا گپ وتران کننگا۔ اوڑدہی ٹی گورنر سندھ صدر مملکت ءِ کراچی ٹی برجا شونداری ڈٹ و سندھ انا سیاسی حالیت آتیا ہم حوال تس۔ صدر مملکت ڈاکٹر عارف علوی بروک آ گچین کاری تے ساف و شفاف وڑاٹ کرفنگ نا گرج آ زور شاغا۔ اوپارے کہ شفاف گچین کاری آن پاکستان اٹی سرسہب جمہوری نظام ءِ مون آ دننگ دوئی مریک، صدر مملکت کراچی ءِ 52 پوسکن آ فائر انجن تا ٹیکی آ گورنر سندھ ءِ مبارکبادی تس۔ صدر عارف علوی پارے کہ پوسکن آ فائر انجن تیان شار انا فائر ایمرجنسی نظام ءِ پین گچین و ترند رفتار کننگ اٹ کمک رسینگک۔ صدر کراچی ٹی جمشید وپاکستان کوارٹرز نا شونداری کن گام گیج کننگ نا گرج آ ہم زور شاغا۔
