اسلام آباد۔ 19 جنوری (اے پی پی) وزیر خارجہ مخدوم شاہ محمود قریشی پارینے کہ دہلی ٹی غیر زموار ءُ حکومت اس جوڑ ءِ، سیاسی مسخت آتیکن انت کہ مس کننگ کیک، جہانی برادری بھارت ءِ ڈیہہ ٹی امن ءِ لتاڑنگ نا زموار گوندے۔ اوغانستان نا تہہ و پیشن گڑاس زموار اریر ہرا سپائلر نا کڑد ءِ ادا کننگ ءُ۔ پی ڈی ایم نا بیانیہ، پاکستان نا دشمن واکدار تا بیانیہ تون مطابقت تخک۔ سے شنبے نادے آ ڈیہہ نا حالیت و پی ڈی ایم نا برانز نا بابت اہم ءُ بیان اسے ٹی وزیر خارجہ پارینے کہ پاکستان، بھارت نا اصلی دروشم ءِ پدریسہ نشان تننگ ءِ۔ 14 نومبر آ ڈوزیئر اٹ نن بھارت نا کنڈآن دہشت گرد آتا کمکاری نا ناقابل تردید شاہدی تے دنیا نا مون آ تخانن۔ وزیر خارجہ پارے کہ بھارت پاکستان ءِ جہانی کہول آ بدنام کننگ کن دروغ انا چم بازی تا مہم نا بناءِ کرے ولے ارنب گوسوامی نا ’’چیٹ‘‘ مون آ بننگ آ پلوامہ ڈرامہ بے نقاب مس۔ بھارت پلوامہ ڈرامہ ءِ، سیاسی مسخت آتا دوئی کننگ کن کرے۔ وزیر خارجہ پارے کہ بھارت نا بی جے پی سرکار گچین کاری تا کسر ءِ آوار کننگ کن تینا ہی 40 فوجی تا جان ءِ ہلک۔ شاہ محمود قریشی پارے کہ دہلی ٹی غیر زموارءُ حکومت اس جوڑ ءِ ہرا سیاسی مسخت آتیکن انت کہ مس کننگ کیک۔ جہانی برادری آ زمواری مریک کہ او بھارت ءِ ڈیہہ ٹی امن ءِ لتاڑنگ نا زموار گوندے۔ اوپارے کہ دنیا پہہ مسنے کہ ہمو بھارت ہرادے او سیکولر ریاست اس تکارہ اوڑآ اسہ فاشٹ، ہندوتوا حکومت اس کوزہ گیرءِ۔ پاکستان، اوغانستان تون اوار ڈیہہ ٹی امن و سوگوی خواہک۔ نن خوانہ بین الاوغان مذاکرات سرسہبی اٹ مرے و تینا ایسر اسکان سرمرے۔ شاہ محمود قریشی پارے کہ اوغانستان نا تہہ و پیشن گڑاس زموار ءُ ہراسپائلر نا کڑد ءِ ادا کننگ ءُ۔ اوپارے کہ کراچی ٹی اسرائیل نامنظور نا بینرآتے سیاسی مسخت آتیکن خلنگ انگ ءِ، ہراتم حکومت، فلسطین نا بابت تینا پالیسی ءِ پیدوار کرینے تو ولدا اسرائیل ءِ امنا کننگ نا سوج ہی ودی مفک۔ وزیراعظم عمران خان وار وار پارینے کہ کنا بیانک ریکارڈ ءُ، وزارت خارجہ دا بابت پیدوار موقف اس تسنے ولدا داوڑنا بینرآتا خلنگ نا مسخت بیرہ سیاست آن بیدس پین ہچ اس اف۔ پی ڈی ایم تینا صف آتیٹی ودوک آ بے چیٹی ءِ ڈکھنگ خواہک و تینا تموک آ شرف ءِ بچفنگ خواہک۔ شاہ محمود قریشی پارے کہ کراچی ٹی گڑاس زموار برانز کن مدرسہ غاتا طالب آتے کاریم اٹ اتنگ خوارہ داملک و ملکی زرگزران کن سہی ءُ گام اس اف۔ کنے یقین ءِ کہ کراچی نا باشعور شاریک اوفتا کنڈآ چکار کپسہ۔ پیپلزپارٹی، وکٹ آتا ہڑتوم آ کنڈآ گوازی کننگ ءِ، او پی ڈی ایم ءِ تینا مسخت آتا دوئی کننگ کن کاریم اٹ اتنگ ءِ۔ مخدوم شاہ محمود قریشی پارے کہ استیفہ غاتا معاملہ غا پیپلزپارٹی فیصلہ ءِ بنفینے کہ او استیفہ تفک۔ لانگ مارچ انا بابت ہم پیپلزپارٹی گومگو نا کیفیت اٹی ءِ۔ پی ڈی ایم نا بیانیہ، پاکستان نا دشمن واکدار آتا بیانیہ تون مطابقت تخک۔ پی ڈی ایم، خواپرساہم پاکستان مخالف واکدار آتا بیانیہ ءِ تہو تننگ ءِ۔
