کوئٹہ۔ 19 جنوری (اے پی پی) گورنر بلوچستان امان اللہ خان یاسین زئی پارینے کہ وزیراعظم پاکستان نا پارت نا رداٹ پاکستان سٹیزن پورٹل(پی سی پی) نا کمک اٹ الس ءِ تینا غاوتا درج کرفنگ نا آسراتی فراوان کننگ بھاز اہم ءُ گام اسے، و دانا بناء آن نئے بیرہ لس بندغ نا عزت نفس بحال مننگ ءِ بلکن دا فورم نا سوب آن ملکی ادارہ غاتیاالس نا پت ہم پین ودسا ہِننگ ءِ۔ گورنر یاسین زئی پارے کہ صوبہ غاتیٹی کاریم کروک آ بنجائی ادارہ غاتا السی غاوتا ازالہ نا بابت چست کروک آ وخت آ گام گیج آتیان ادارہ غاتا کارکڑد اٹی گچینی بننگ آن بیدس جوابدہی و شفافیت نا عمل ہم سوگو مننگ ءِ۔ داخیال آتا درشانی ءِ او سے شنبے نادے آ گورنر ہاؤس کوئٹہ ٹی صوبہ بلوچستان اٹی کاریم کروک آ غٹ بنجائی ادارہ غاتا نمائندہ غاتون اڈ ہلوک آ اولیکو درستی راستی دیوان اٹی گپ وتران کرسا کرے۔ یات سلے کہ وزیراعظم پاکستان عمران خان ملک انا غٹ صوبہ غاتا گورنرز آتے پاکستان سٹیزن پورٹل نا کمک اٹ صوبہ غاتیٹی کاریم کروک آ بنجائی ادارہ غاتیٹی السی غاوتا ازالہ نا نظام نا جاچ ءِ ہلنگ نا زمواری تننگانے۔ دارداٹ اینو گورنر ہاؤس کوئٹہ ٹی پرائم منسٹر ڈلیوری یونٹ نا رداٹ گورنر بلوچستان مانیٹرنگ ڈیش بورڈ صوبہ ٹی بنجائی ادارہ غاتا کارکڑد ءِ ہُننگ و جاچ ءِ ہلنگ آ سرجم گپ وتران کننگا۔ دیوان اٹی غٹ تعلقدار ادارہ غاتے ماہانہ پروگریس رپورٹ ءِ گورنر سیکرٹریٹ ءِ جمع کننگ و ہر مسہ تُو آن پد تینا ادارہ غاتیان وزیراعظم ہاؤس ءِ معلومدار کننگ آ امنا کننگا۔ دیوان اٹی بشخ ہلوک آتا سلاہ و سلاہ و سوج آتیٹی کیہی اہم فیصلہ کننگا۔
