صدر آزاد جموں و کشمیر سردار مسعود خان نا بھارتی صحافی و اینکر ارناب گوسوامی نا واٹس ایپ چیٹ انا لیک مننگ آ تران

اسلام آباد۔ 18 جنوری (اے پی پی) آزاد جموں و کشمیر نا صدر سردار مسعود خان پارینے کہ بھارت نا مچ آ تاریخ دروغ، دروہ و ہٹکل آن پُر ءِ ہرانا پڑدہ داسہ کرار کرار آ پاش مننگ ءِ و دنیا نا مون آ اونا داسہ اسل حقیقت پاش مرسا مون آ بننگ ءِ، باٹی رام رام و بغل اٹ کاچو نا اصل مطلب ءِ اگہ پہہ مروئی مرے تو دنیا نریندر مودی، امیت شاہ و راج ناتھ سنگھ کون آ لیڈر آتے ہُرے ہرا ہمسایہ ءِ بدنام کننگ کن تینا ہی فوج انا ورناتے کسفنگ آن اسہ کنڈ مفسہ، بھارت پلوامہ نا ہرا ڈرامہ ءِ کریسس اودے مودی حکومت نا تینا ہی پروردہ اسہ صحافی اس طشت ازبام کرسا مچ آ حقیقت ءِ دنیا نا مون آتخانے۔ بھارتی صھافی و ٹی وی اینکر ارناب گوسوامی نا ساڑی آ واٹس ایپ چیٹ انا لیک مننگ آ تران کرسا صدر آزاد کشمیر پارے کہ بھارتی حکمران تا پاکستان نا برخلاف سازش و فالس فلیگ آپریشن نا تاریخ 1971 آن بناکرسا نصف صدی آ تالان ءِ ہراٹی 1971 اٹی گنگاہائی جیکنگ نا آڑاٹ بھارتی فضائی دنگ ءِ کاریم اٹ اتنگ آن پاکستان ءِ توننگ و چٹھی سنگھ پورہ ٹی 35 سکھ آتے کسفسا اونا دوبہ ءِ پاکستان آ خلنگ و وخت اس پٹھان کوٹ و اُوڑی کون آ ڈرامہ کرسا دنیاءِ دھوکہ تننگ کون آ کیہی درور آتیان منہ درور ءُ۔ اوپارے کہ بھارتی حکمرانک دا واقعہ غاتاآڑاٹ پاکستان نا برخلاف الزام تراشی تو ضرور کریر ولے وخت اس ہم عدالت یا جاست وپاستی کمیشن نا کمک اٹ دا دوبہ غاتے پک کننگ کتوس۔