اسلام آباد۔ 18 جنوری (اے پی پی) کورونا نا دین اتون مون تننگ کن ہسپتال و طبی ہند آتیٹی آسراتی تیٹی ودکی کن اسٹیٹ بینک انا اسکیم نا رداٹ داتم اسکان 9.073 ارب روپئی نا وام جاری کننگانے۔ اسٹیٹ بینک دین اتون مون تننگ نا کوشست آتارداٹ دا اسکیم نا بناءِ کریسس۔ اسکیم نا مسخت دین اتون مون تننگ کن ہسپتال ، طبی ہند و فارمیسی تا کاریم نا کچ اٹی ودکی و قرنطینہ آسراتی تا فراوانی ٹی کمک تننگ ناءِ۔ اسٹیٹ بینک انا رداٹ دا اسکیم نا رداٹ داتم اسکان 46 ہسپتال، طبی ہند و فارمیسی تا کنڈآن 13.813 ارب روپئی مالیت نا وام تا درخواست موصول مسنے ہرافتیان 42 درخواست آتا منظوری ءِ تننگا و دا ہسپتال و طبی ہند آتے 9.073 ارب روپئی نا وام جاری کننگانے۔ اسٹیٹ بینک کورونا نا دین اتون مون تننگ کن کمکاری اسکیم نا رداٹ ہسپتال و طبی ہند آتیکن مہالو وام تا حد ءِ 20 کروڑ روپئی مقرر کریسس ہرادے اوکان پد ودفسا 50 کروڑ روپئی کننگا۔ اسٹیٹ بینک بیک آتے دا اسکیم ءِ بے سود آن فراوان کننگ ءِ وخت اس کہ ایلو بینک، ہسپتال یا طبی ہند آتے 3 درسد سالانہ نا کچ آن وام فراوان کننگ ءِ۔ اسکیم اٹی کورونا دین انا ناجوڑ آتا درمان کن بھلو کچ اسے آ آسراتی تا فراوانی ءِ ممکن کننگ انگ ءِ۔
