اسلام آباد۔ 18 جنوری (اے پی پی) جہانی بینک پاکستان کن پوسکن کنٹری شریداری فریم ورک (سی پی ایف) نا تیاری نا رداٹ سلابتی عمل نا بناءِ کرینے۔ داہیت ءِ پاکستان اٹی جہانی بینک انا کنٹری ڈائریکٹر ناجی بن حسائن دوشنبے نادے آ پارے۔ اوپارے کہ 2022آن ہلیس 2026اسکان نا مد اکن پاکستان تون پوسکن آ شریداری فریم ورک انا ٹہیفنگ نا رداٹ سلابتی عمل نا بناءِ کننگانے۔ فریم ورک اٹی پاکستان کن اسٹریٹجک کمکاری نا خدوخال پیدوار مریک۔ اوپارے کہ جہانی بینک ہر 4 آن ہلیس پنچ سال آن پد باسک ملک آتیکن پوسکن کنٹری پارٹنر شپ فریم ورک اس تیار کیک ہراٹی ہر باسک ملک انا بدل مروک آ اولیت آتے اوار کننگک۔ ناجی بن حسائن پارے کہ پوسکن آ فریم ورک اٹی جہانی بینک انا کمکاری ءِ پاکستان نا شونداری ایجنڈا تون مربوط کننگک۔ اوپارے کہ پوسکن آ فریم ورک انا ٹہیفنگ اٹ کلیدی شریدار، حکومتی کمامدار، پارلیمنٹرینز،نجی بشخ، سول سوسائٹی نا تنظیم بشمول زالبول و ورناتا پڑک، جہانی مالیاتی ادارہ، سفارتی کمیونٹی، میڈیا و تعلیم نا چاہندار آتون سلابت کننگ انگ ءِ۔ داسلابت نا مسخت پاکستان نا اقتصادی و راجی چیلنج آتا کلیدی شریدار آتا متنوع رائے و خیال آتیان آگاہی دوئی کننگ و اودے مون آ تخسا کمکاری عمل ءِ مون آ دننگ نا ءِ۔
