اسلام آباد۔ 15 جنوری (اے پی پی) بنجائی وزیر تعلیم کسبی تربیت شفقت محمود پارینے کہ ملک اٹی کورونا دین انا حالیت آتا جاچ ءِ ہلنگ آن پد دا فیصلہ ءِ کننگانے کہ نہہ می آن دُوانزدہ می جماعت اسکان اسکول آتے 18 فروری آن ملنگک،کچی آن ہشت می جماعت اسکان و یونیورسٹی تے یکم فروری آن ملنگک، بروک آہفتہ کورونا دین انا حالیت آتا جاچ ءِ ہلنگ کن دُوارہ دیوان اس مریک۔ ہراشار تیٹی دین انا حالیت گچین مفک ہموڑے تعلیمی ادارہ غاتے ملنگپک۔ جمعہ نادے آ او نیشنل کمانڈ اینڈ آپریشن سینٹر اٹی ملک اٹی کورونا نا حالیت و تعلیمی ادارہ غاتا ملنگ نا بابت مروک آ اہم دیوان آن پد پریس کانفرنس کریکہ۔ دیوان اٹی غٹ صوبائی وزیر تعلیم، وزیر جان جوڑی، چیف سیکرٹریک و ایلو تعلقدار کمامدارآک ساڑی ئسر۔ بنجائی وزیر دیوان نا فیصلہ غاتیان معلومدار کرسا پارے کہ 26 نومبر آ فیصلہ کننگاسس کہ 18 فروری آ مڈل آن دُوانزدہ جماعت اسکان 25 فروری آ پرائمری و یکم فروری آ یونیورسٹیک ملنگرہ۔ ولے کورونا دین انا حالیت آتیٹی کمتی متو ہنداخاطرآن نن تینا فیصلہ ٹی ردوبدل کرینن۔ اوپارے کہ داسال ننا اصولی فیصلہ ءِ کہ اسٹ اسے ہم بیدس امتحان آن پاس کننگپک۔ نہہ می آن دُوانزدہ می جماعت اسکان بورڈ انا امتحان تے مروئی ءِ ہنداخاطرآن کلاس آک 18 جنوری آن بناکیرہ۔ پرائمری کلاس آک داسہ 25 جنوری نا جاگہ غا یکم فروری آ بناکیرہ وخت اس کہ یونیورسٹیک یکم فروری آن ملنگرہ۔ اوپارے کہ بروک آ ہفتہ کورونا نا دین انا حالیت آتا جاچ ءِ ہلنگ کن بین الصوبائی وزیر تعلیم نا دیوان دُوارہ مریک۔ اوپارے کہ ہُننگانے کہ گڑاس شار تیٹی کورونا دین کیس آتا اوسط زیات ءِ و گڑاسے ٹی کم ءِ۔ دا دیوان اٹی غٹ شار و علاقہ غاتیٹی دین انا حالیت آتا جتا جتا جاچ ءِ ہلنگک و مننگ کیک کہ ہرا شار تیٹی کورونا کیس آتا اوسط زیات ءِ اوفتیٹی اہم تعلیمی ادارہ غاتا ملنگ نا فیصلہ ٹی دُوارہ نظرثانی کین ولے دا ٹارگیٹڈ شار تیکن مریک۔ ہرا علاقہ و شارتیٹی حالیت آک گچین ءُ اوفتیا اونا ہچ ءُ اثراس مفک و ہموڑے اسکول و ایلو تعلیمی ادارہ غاتے ملنگک۔ اوپارے کہ تعلیم و سیاست تون گنڈوک غٹ بندغ آتے احساس ارے کہ 8 تُو تعلیمی ادارہ غاتا بند مننگ آن تعلیم نا بھلو نسخان اس مس ولے جان جوڑی نا خیال ءِ تخنگ ہم بھاز المی ءِ و ننے ہڑتوم آتے بیلنس کروئی ءِ۔ اوپارے کہ جان جوڑی نا چاہندار آتا پاننگ ءِ کہ تعلیمی ادارہ غاتا بند کننگ آن کورونا کیس آتا کچ اٹی کمتی بسنے۔ ہراتم تعلیمی ادارہ غاک ملنگاسر تو کورونا نا مثبت کیس آتا کچ 7.14 مسوسس۔ داسہ دا کچ اٹی کمتی مسنے۔
