اسلام آباد۔ 15 جنوری (اے پی پی) بنجائی وزیر انفارمیشن ٹیکنالوجی و ٹیلی کمیونیکیشن سید امین الحق پارینے کہ سوشل میڈیا ایپ’’وٹس ایپ‘‘ نا پوسکن آ پالیسی نا بابت پاکستانی صارف آتا گڑتی آن جوانی اٹ معلومدار اُن، غٹ باندات آتا خوڑتی اٹ جاچ ءِ ہلسا تیناپالیسی تے مرتب کننگ اُن ہرانا رداٹ پرسنل ڈیٹا پروٹیکشن بل، سرکاری ملازم آتیکن چیٹنگ ایپلی کیشن نا تیاری تون اوار سوشل میڈیا کمپنی تتون رابطہ ٹی ترندی اتنگانے۔ جمعہ نادے آ تینا اسہ بیان اسے ٹی بنجائی وزیر انفارمیشن ٹیکنالوجی پارے کہ داوخت آ وٹس ایپ نا متنازعہ اپ ڈیٹڈ رازداری پالیسی سرحال بحث جوڑ مسنے، دُن تو واٹس ایپ انتظامیہ نا وضاحتی بیان نا رداٹ پرائیویسی پالیسی نا اطلاق انفرادی صارف آتیا آخا بلکن ’’بزنس کنزیوم‘‘ تیا مریک ولے دا ہم حقیقت ءِ کہ 2014 ء ٹی فیس بک واٹس ایپ ءِ ہلکوسس تو اونا کنڈآن ہندا پاننگاسس کہ او رازداری نا بابت تینا پالیسی تے بدل کپسہ۔ 2016ء ٹی واٹس ایپ صارف آتے دا اختیار تسوسس کہ او تینا معلومداری تے ایلو کمپنی تے کاریم اٹ اتنگ نا موکل ایتر یا تفس ولے او تینا دا جہانی کمٹمنٹ نا برخلاف تینا تازہ اپ ڈیٹڈ پالیسی ءِ صارف آتا قبول کپننگ نا حالیت اٹ ایپلی کیشن ڈیلیٹ کننگ نا ہرا ہیت ءِ کرینے او گڑتی نا سوب ضرور ارے انتئے کہ داحق ءِ صارف آتیان پلنگ مفک کہ او تینا ڈیٹا ءِ کس اسے شیئر کننگ نا موکل ایتر یا تفس، داڑآ اسہ کمپنی اس ہم تینا مرضی ءِ مسلط کننگ کپک و نن سمجھنہ کہ داڑآن صارف آتا حق بھاز بے وڑزہمی مننگ کیک۔ سید امین الحق پارے کہ اگہ وٹس ایپ تینا دا پوسکن آ پالیسی ءِ جاری کرینے تو اول بطور سبجیکٹ صارف نا سلاہ ءِ ہلنگوسس ولدا اودے مچ آ دنیا کن اسہ وڑ مروسس ولے یورپ، برازیل و امریکہ ٹی دا پوسکن آ پالیسی تا اطلاق مفک ہرانا بنداوی سوب ہموڑے ساڑی رازداری نا بابت سخت کانود آک ءُ ہرافتا پاسداری ءِ کننگ کن وٹس ایپ پابند ءِ۔ بنجائی وزیر آئی ٹی پارے کہ واٹس ایپ نا کنڈآن صارف آتا حساس ڈیٹا شیئرنگ پالیسی آن پد داسہ دا المی مسوسس کہ نن پرسنل ڈیٹا پروٹیکشن بل آ تینا کاریم نا رفتار ءِ ترند کین تانکہ نان شاری تا پرائیویسی ءِ زوت آن زوت رکھوک کننگ مرے۔ اوپارے کہ دا چرجوئی ٹی نن تدوک آ اسہ سال آن پرسنل ڈیٹا پروٹیکشن بل انا مسودہ غا جاری کاریم ءِ ترند کرسا پنچ شنبے آ دا بابت فائنل جاچ دیوان اس اڈ تسن ہراٹی غٹ امور ءِ سرجم سجفنگ آن پد حتمی ریسہ ٹی داخل کرینن ہرادے منہ دے اٹی تعلقدار محکمہ غا گدریفسا پارلیمنٹ اٹی کانود سازی کن پیش کننگک۔
