اسلام آباد۔ 15 جنوری (اے پی پی) وزیراعظم نا سلاہکار پارلیمانی امور ڈاکٹر بابر اعوان پارینے کہ احتساب نا کانود ءِ مسلم لیگ (ن) نا حکومت ایسوسس، پیپلزپارٹی و مسلم لیگ (ن) تدوک آ 10 سال اٹی احتساب و نیب انا کانود اٹی بدلی کتنو، نن آرڈیننس ایسن تو سینیٹ نا اسہ کمیٹی اس ہم اوڑآ دُوخلتو، پی ٹی آئی نا حکومت کانودو انصاف نا نظام اٹی اصلاحات خواہک، نن ادارہ غاتے فعال کرین، داسہ این آر او تفننگک و احتساب مریک، فیصلہ کیر کہ اسہ مفرور اسے ہم پاکستان آن پیشن ہِننگ کن ہلیپسہ۔ پلوک آ دولت ءِ پدی اتینہ و ہچ کس احتساب آن ایڑتر مفک، غٹ ءِ عدالت آتیٹی سرنڈر کننگ و تینا بے گناہی ءِ پک کروئی مرے۔ جمعہ نادے آ ایوان بالانا دیوان اٹی ڈپٹی چیئرمین سینیٹ نا چست کروک آ ٹک آتا ورندی ءِ ترسا اوپارے کہ پارلیمان یا اونا کمیٹی چاروکی نا فرض ءِ سرایتک و او ہر کس آن سوج کننگ کیک ولے پارلیمان و ایلو ادارہ غاتا کڑد انا بابت کانود پیدوار و متعین ءِ۔ پارلیمان نا کاریم چاروکی ءِ۔ نن فائن لائنز ءِ بایدے ذہن اٹ تخن۔ ہراتم آن دا کانود جوڑ مسنے اوٹی ریفارمز انا کوشست کننگتنے۔ احتساب ایکٹ 1997 آ اتنگا تو مسلم لیگ (ن) نا حکومت ئس، پر مشرف ترمیم کرے۔ تدوک آ 10 سال اٹی نیب واحتساب کانود نا بابت ترمیم کننگتنے۔ نن تینا احتساب نا ایجنڈا نا رداٹ ریفارمز درستی راستی کرفینن ہرافتا مسخت کاروبار ءِ آسان کننگ نا ءِ۔ دانا سوب ملک اٹی اکانومی و صںعت آک چلینگ نا بناءِ کرینو۔ وڈی خور و پروسیجرل لیپس اٹی پرخ ءِ رواتخانن۔
